სოციალურად დაუცველების გადამოწმების დაწყება სწორია, თუმცა მიდგომა პოლიტიკური არ უნდა იყოს - სურგულაძე
ჯანდაცვის სპეციალისტი, ვატო სურგულაძე აცხადებს, რომ სოციალურად დაუცველი ოჯახების გადამოწმების პროცესის დაწყება სწორია.
როგორც სურგულაძე BMG-სთან აცხადებს, სახელმწიფოს მხრიდან შემწეობას მხოლოდ ის ადამიანები უნდა იღებდნენ, რომლებიც მას რეალურად საჭიროებენ.
თუმცა მისივე თქმით, ეს პროცესი სწორად უნდა წარიმართოს და მასში პოლიტიკური კომპონენტი არ უნდა იყოს, როგორც ეს გასულ პერიოდში ხდებოდა.
“მე-13 წელია, ხელისუფლებაში არიან და რატომღაც ახლა მოუვიდათ აზრად, რომ უნდა გადაამოწმონ [სოციალურად დაუცველები]. რა თქმა უნდა, უნდა გადაამოწმონ და ვისაც არ ეკუთვნის, არ უნდა იღებდეს [დახმარებას]. მეც კი ვიცი ოჯახები, რომელთაც საკმაოდ დიდი შემოსავალი აქვთ და მაინც სარგებლობენ სიღარიბის ზღვარს ქვემოთ მცხოვრები ადამიანების ყველა პრივილეგიით. თუ ჩვენ ვსაუბრობთ, რომ ოჯახის ერთ წევრზე შემოსავალი 1000 ლარზე მეტი უნდა იყოს, ეს, რა თქმა უნდა, ნორმალური მიდგომაა. მაგრამ რეალური შემოწმება უნდა იყოს და ისევ ისე არ მოხდეს, რომ ადამიანები, რომლებსაც გაცილებით მეტი შემოსავალი აქვთ, ისევ იყვნენ ამ ბაზაში ჩასმული.
უბრალოდ 13 წელი ყოველი არჩევნების წინ რომ იზრდებოდა ეს ბაზა, მაშინ რატომ არ იყო ამაზე საუბარი? მუდმივი დაშინება იყო, თუ არ მიხვალ არჩევნებზე, თუ არ მოგვცემ ხმას, შესაბამისი ბაზიდან ამოვარდები. მაშინ რატომ არ იყო ამაზე საუბარი, ძალიან მაინტერესებს. პოლიტიკური მიდგომა არ უნდა იყოს ამ შემთხვევაში, არამედ რეალური, უნდა დავეხმაროთ იმ ხალხს, ვისაც შემოსავლის პრობლემა აქვს. იდეა სწორია, ვისაც არ ეკუთვნის, არ უნდა იღებდეს ამ დახმარებას”, - განაცხადა ვატო სურგულაძემ.
ცნობისთვის, ჯანდაცვის სამინისტრომ სოციალურად დაუცველი ოჯახების გადამოწმება დაიწყო. ოჯახს, რომლის თითოეულ წევრზე გაანგარიშებით 1 250-ლარიანი შემოსავალი აქვს, სოციალური შემწეობა შეუწყდება.