SpaceX, Anthropic და OpenAI საფონდო ბირჟაზე გასასვლელად ემზადებიან – როგორია მოლოდინები?

ამერიკული კომპანიები SpaceX-ი, Anthropic-ი და OpenAI-ი საფონდო ბირჟაზე აქციების პირველადი საჯარო განთავსებისთვის აქტიურად ემზადებიან. ფინანსური ანალიტიკოსები პროგნოზირებენ, რომ ეს იქნება ტექნოლოგიური სექტორის უმსხვილესი საჯარო განთავსების ტალღა dot-com-ის ეპოქის შემდეგ, რადგან სამივე ტრილიონიანი კომპანია ბაზარზე შესვლას მიმდინარე წელს გეგმავს.

როგორც ირკვევა, ამ პროცესში ყველაზე მეტად კოსმოსური ტექნოლოგიების გიგანტი, SpaceX-ი არის დაწინაურებული. კომპანიამ საჯარო S-1 განაცხადი უკვე წარადგინა და IPO-ს 2026 წლის შუა პერიოდისთვის გეგმავს, რაც პირველად საჯარო პრეზენტაციებსაც მოიცავს. კომპანია $1.75-ტრილიონიან შეფასებას ისახავს მიზნად და გავრცელებული ინფორმაციით, $75 მილიარდამდე კაპიტალის მოზიდვას აპირებს. საინვესტიციო პროცესს 21 ბანკისგან შემდგარი სინდიკატი უზრუნველყოფს, რომელსაც Goldman Sachs-ი ხელმძღვანელობს.

ამასთან, ხელოვნური ინტელექტის სფეროში მომუშავე კომპანია Anthropic-ი ბირჟაზე გასვლას, შესაძლოა, უკვე 2026 წლის ოქტომბერში შეეცადოს. კომპანია, რომლის სავარაუდო საბაზრო ღირებულება $900 მილიარდიდან $1.2 ტრილიონამდე მერყეობს, დაახლოებით $30 მილიარდის მოზიდვას გეგმავს. საჯარო განთავსების პროცესს ისეთი მსხვილი ფინანსური ინსტიტუტები უძღვებიან, როგორებიც Goldman Sachs და Morgan Stanley არიან.

პარალელურად, მიმდინარე წლის მეოთხე კვარტალში იგეგმება კიდევ ერთი წამყვანი ტექნოლოგიური კომპანიის, OpenAI-ის IPO. არსებული მონაცემებით, ბაზარზე შესვლის პროცესში კომპანია $60 მილიარდზე მეტის მოზიდვას გეგმავს, მისი სავარაუდო საბაზრო ღირებულება კი $900 მილიარდიდან $1 ტრილიონამდე იქნება.

ანალიტიკოსების მოლოდინით, სამივე მეგა-IPO მინიმუმ ტრილიონი დოლარით გაიხსნება და საუკეთესო შემთხვევაში, ჯამური განთავსებების შეფასება $4 ტრილიონს მიაღწევს, რაც 2026 წელს ისტორიაში საუკეთესო IPO-ების პერიოდად აქცევს.