სუსმა ჯაშუშობის ბრალდებით მოქმედი მაღალჩინოსანი დააკავა

სახელმწიფო უსაფრთხოების სამსახურის კონტრდაზვერვის დეპარტამენტმა, უცხო ქვეყნის სპეცსამსახურების სასარგებლოდ ჯაშუშობის ბრალდებით, საქართველოს ერთი მოქალაქე დააკავა. ამის შესახებ ბრიფინგზე სუსის უფროსის პირველმა მოადგილემ, ლაშა მაღრაძემ განაცხადა.

გამოძიების ვერსიით, დაკავებული ერთ-ერთ სახელმწიფო უწყებაში მაღალ თანამდებობაზე დასაქმებული საჯარო მოხელეა, რომელიც ქვეყნის ინტერესების საწინააღმდეგოდ, სისტემურად მოიპოვებდა და გადასცემდა ინფორმაციას უცხოურ სპეცსამსახურებს.

ლაშა მაღრაძემ ბრიფინგზე დეტალურად ისაუბრა ბრალდებულის საქმიანობისა და კონსპირაციის მეთოდების შესახებ. გთავაზობთ მის განცხადებას სრულად.

„სახელმწიფო უსაფრთხოების სამსახურის კონტრდაზვერვის დეპარტამენტის მიერ, ბოლო რამდენიმე თვის განმავლობაში, ინტენსიურ რეჟიმში გატარებული კონტრდაზვერვითი ღონისძიებების შედეგად, ჯაშუშობისთვის, კერძოდ უცხო ქვეყნის სპეცსამსახურის თანამშრომლების დავალებით ინფორმაციის შეგროვებისა და გადაცემის ბრალდებით, დაკავებულია საქართველოს ერთი მოქალაქე.

დაკავებულს უცხო ქვეყნის სპეცსამსახურის წარმომადგენელთან გააჩნდა მაღალ დონეზე ორგანიზებული კონსპირაციული ხასიათის სისტემატური კონტაქტები. შეხვედრები იგეგმებოდა დაშიფრული ორმხრივი კავშირის გამოყენებით და იმართებოდა სხვადასხვა ლოკაციაზე, წინასწარ შეთანხმებული კონსპირაციის პირობების მკაცრი დაცვით. ინფორმაციის მიწოდება ხორციელდებოდა, როგორც პირისპირ კონტაქტის, ასევე ელექტრონული საშუალებების გამოყენებით.

უცხო ქვეყნის სპეცსამსახურისათვის გადაცემული ინფორმაცია მოიცავდა სხვადასხვა კატეგორიის საიდუმლო მონაცემებს, რომლებიც დაკავშირებული იყო საქართველოში მიმდინარე პოლიტიკურ-ეკონომიკურ პროცესებთან, ძალოვან უწყებებსა და უსაფრთხოების სტრუქტურებში არსებულ ვითარებასთან, ეთნიკური და რელიგიური უმცირესობების შესახებ ინფორმაციასა და ინფორმაციის გადაცემის დამკვეთებისათვის საინტერესო სხვა მონაცემებთან.

გარდა ამისა, მოპოვებული მტკიცებულებებით დგინდება, რომ უცხო ქვეყნის სპეცსამსახურის წარმომადგენლის დავალებით, დაკავებული პირი მუშაობდა საინფორმაციო პლატფორმების შექმნაზეც, რომლის მიზანი იყო მედია სფეროს წარმომადგენლების მოზიდვა და აღნიშნული ქსელის გამოყენებით, უცხო ქვეყნის სპეცსამსახურის დაინტერესების შესაბამისად, სადაზვერვო ხასიათის ინფორმაციის მოპოვება, მათ შორის რეგიონის ქვეყნების მიმართულებით.

აღნიშნულ საქმიანობას ბრალდებული მატერიალური სარგებლის მიღების მიზნით ახორციელებდა. საქმიზე გამოძიება საქართველოს სისხლის სამართლის კოდექსის 314-ე მუხლის პირველი ნაწილით მიმდინარეობს, რაც სასჯელის სახით 8-დან 12 წლამდე თავისუფლების აღკვეთას ითვალისწინებს“.

სუსის ინფორმაციით, ბრალდებული ინფორმაციის მოსაპოვებლად იყენებდა როგორც ამჟამინდელ სამსახურებრივ მდგომარეობას, ისე წარსულში დაკავებულ პოზიციებსა და სხვადასხვა უწყებაში არსებულ პირად კავშირებს. ამ ეტაპზე უწყებას არ დაუკონკრეტებია, თუ რომელი ქვეყნის სასარგებლოდ მუშაობდა დაკავებული პირი.