Tencent-ის შემოსავალი 9%-ით გაიზარდა, თუმცა შედეგები ანალიტიკოსების პროგნოზებს ჩამორჩა

ჩინური ტექნოლოგიური გიგანტის, Tencent-ის შემოსავალი მიმდინარე წლის პირველ კვარტალში 9%-ით გაიზარდა და 196.5 მილიარდი იუანი ($28.9 მლრდ.) შეადგინა. საყურადღებოა, რომ აღნიშნული მაჩვენებელი ანალიტიკოსების მიერ პროგნოზირებულ 199 მილიარდ იუანს ჩამორჩა.

როგორც ირკვევა, კომპანიის ფინანსურ შედეგებზე გავლენა სათამაშო ინდუსტრიაში ზრდის ტემპის შენელებამ იქონია. თუ გასული წლის ანალოგიურ პერიოდში შიდა ბაზარზე სათამაშო სექტორის შემოსავლები 24%-ით გაიზარდა, ამჯერად მაჩვენებელი მხოლოდ 6%-ით გაიზარდა და 45.4 მილიარდი იუანი ($6.7 მლრდ.) შეადგინა.

პარალელურად, Tencent-ის ფინანსური ტექნოლოგიებისა და ბიზნეს სერვისების მიმართულებამ მნიშვნელოვანი ზრდა აჩვენა. ამ სეგმენტის შემოსავალმა იანვარ-მარტის პერიოდში 60 მილიარდი იუანი ($8.8 მლრდ.) შეადგინა. მნიშვნელოვანია ითქვას, რომ ბიზნეს სერვისებიდან მიღებული შემოსავლის 20%-იანი მატება ღრუბლოვან ტექნოლოგიებსა და ხელოვნურ ინტელექტზე გაზრდილმა მოთხოვნამ განაპირობა. კომპანიის აღმასრულებელი დირექტორი, მა ხუატენი აცხადებს, რომ მათ მიერ შექმნილი AI ინსტრუმენტი „ვორქბადი“ ჩინეთში ყველაზე პოპულარული აგენტური სერვისია.

რაც შეეხება სარეკლამო მიმართულებას, ხელოვნური ინტელექტის ინტეგრაციამ შემოსავლების 20%-იანი მატება გამოიწვია. Morningstar-ის უფროსმა ანალიტიკოსმა, აივან სუმ განმარტა, რომ AI სფეროში განხორციელებულმა ინვესტიციებმა უკვე აშკარა შედეგები მოიტანა. მისივე თქმით, სათამაშო სექტორში დაფიქსირებული შენელება არა მოთხოვნის პრობლემას, არამედ ჩინური ახალი წლის პერიოდის გამო შემოსავლების ასახვის პროცესის გაჭიანურებას უკავშირდება.

კვარტალური შედეგების გამოქვენყების შემდეგ Tencent-ის აქციების ფასი ბირჟაზე 1.18%-ით გაიზარდა. ამჟამად ტექ-გიგანტის ერთი აქცია 461.4 ჰონგ-კონგურ დოლარად ($59.20) იყიდება.

შეგახსენებთ, Tencent-ი მსოფლიოს ერთ-ერთი უმსხვილესი ტექნოლოგიური კომპანიაა. ის ფლობს პოპულარულ საკომუნიკაციო პლატფორმა WeChat-ს და ლიდერ პოზიციებს იკავებს გლობალურ სათამაშო ინდუსტრიაში.