ტენდერებში “შავი სიის” მექანიზმის გამკაცრება მეტ სანდოობას გააჩენს სექტორში და ხარისხსაც გაზრდის - ამირან მამუჭაძე
ინფრასტრუქტურის მშენებელი კომპანიების ნაწილი სახელმწიფო შესყიდვებში “შავი სიის” მექანიზმის გამკაცრებას დადებითად აფასებს.
საქმე ისაა, რომ პარლამენტის მიერ "სახელმწიფო შესყიდვების შესახებ" კანონში დაჩქარებული წესით მიღებული ცვლილებების თანახმად, თუ კომპანია ხელშეკრულების მიღების მიზნით არაკეთილსინდისიერ ქმედებას ჩაიდენს, მისი „შავ სიაში“ რეგისტრაციის ვადა დღეს არსებული ერთი წლის ნაცვლად ორ წლამდე გაიზრდება. გარდა ამისა, სახელმწიფო შესყიდვებში მონაწილეობა შეეზღუდებათ იმ კომპანიებსაც, რომელთა დამფუძნებლები ან ხელმძღვანელები დაკავშირებული არიან „შავ სიაში“ რეგისტრირებულ პირებთან.
როგორც BMG-სთან "ბლექსი გრუპის" გენერალური დირექტორი აცხადებს, დღეს ხშირია შემთხვევები, როდესაც დისკვალიფიცირებული კომპანიის დამფუძნებლები ახლად გახსნილი იურიდიული პირით ხელახლა იღებენ ტენდერებში მონაწილეობას და იმარჯვებენ. შედეგად, კი მისი თქმით, ზარალდება როგორც პროექტების ხარისხი, ასევე არაკონკურენტულ პირობებში დგებიან კეთილსინდისიერი კომპანიები.
ამირან მამუჭაძე ამბობს, რომ "შავ სიასთან" დაკავშირებით მიღებული ცვლილებები დადებითად აისახება ინფრასტრუქტურული პროექტების ხარისხზე.
“დღეს ბაზარზე ძალიან ბევრი არაკეთილსინდისიერი მიმწოდებელია, რაც გამოიხატება იმაში, რომ ერთი კომპანია როდესაც გაკოტრდება, ეგრევე ხდება კომპანიის ჩანაცვლება და სახელმწიფო ვერ უზრუნველყოფს სწორი, კეთილსინდისიერი პარტნიორის შერჩევას. შავი სიის გამკაცრება ცალსახად უზრუნველყოფს სწორი, პროფესიონალი და კეთილსინდისიერი მიმწოდებლების დახარისხებას, ჩამოყალიბებას და უფრო მეტ სანდოობას გააჩენს სექტორში და ბიზნესში. არა მარტო მშენებლობაში, ნებისმიერ სხვა სახის სახელმწიფო შესყიდვებშიც.
კეთილსინდისიერ კომპანიებს შავ სიაში მყოფი ორგანიზაციები ყოველთვის პრობლემას უქმნიდნენ და სახელმწიფოს მიერ ჩატარებულ ტენდერებში ძალიან ხშირად იგებდნენ ისეთი კომპანიები, რომლებიც არაერთხელ იყვნენ შავ სიაში მოხვედრილები, ან მათი დამფუძნებლები, რომლებმაც ახალი კომპანიები შექმნეს. ვერ ვითარდებოდა [სექტორი] და ვერ ხორციელდებოდა პროექტები. დღეს ეს გადაწყვეტილება ერთგვარად მაკონტროლებელი სისტემის გაძლიერებაა, სადაც არაკეთილსინდისიერი ფიზიკური პირები და კომპანიები იზღუდებიან რომ მიიღონ მონაწილეობაში ტენდერებში. ეს საკმაოდ აამაღლებს სწორი მიმწოდებლების, სწორი კომპანიების სტატუსს და ხარისხზეც იმოქმედებს.