ტოდ ბოელი და მარკ უოლტერი წილებს გაყიდიან - “ჩელსის” კონტროლი Clearlake-ს გადაეცემა

„ჩელსის“ თავმჯდომარე ტოდ ბოელი და დირექტორი მარკ უოლტერი შეთანხმდნენ, რომ კლუბში არსებული 25%-იანი წილი კომპანია Clearlake Capital-ს მიჰყიდონ. გარიგების შედეგად „ჩელსის“ ღირებულება 5 მილიარდ ფუნტად განისაზღვრა.

გარიგება Clearlake-ს „ჩელსის“ სრულ კონტროლს გადასცემს. კომპანია კლუბის 86.5%-ს ფლობს, ხოლო შვეიცარიელ მილიარდერ ჰანსიორგ ვისს დარჩება 13.5%.

ტოდ ბოელი იყო იმ კონსორციუმის სახე, რომელმაც „ჩელსი“ 2022 წელს შეიძინა, თუმცა ამ პერიოდის განმავლობაში კლუბში ყველაზე გავლენიან ფიგურად Clearlake Capital-ის თანადამფუძნებელი ბეჰდად ეგბალი ჩამოყალიბდა. „ჩელსიში“ აცხადებენ, რომ გარიგების დასრულების შემდეგ კლუბის ყოველდღიურ საქმიანობაში, ხელმძღვანელობაში ან სტრატეგიულ მიმართულებაში ცვლილებები არ იგეგმება.

ბოელი და უოლტერი თავიანთ ინვესტიციაზე მცირე მოგებას მიიღებენ. ამასთან, „ჩელსის“ დირექტორთა საბჭო დატოვა ჯონათან გოლდსტაინმაც, ბოელისა და უოლტერის მსგავსად. მათ კლუბის მმართველობაში, მართვასა და გადაწყვეტილებების მიღების პროცესში აღარანაირი როლი აღარ ექნებათ.

„ჩელსის“ ყოფილი მფლობელი რომან აბრამოვიჩი ბრიტანეთის მთავრობის გადაწყვეტილებით კლუბის გაყიდვას იძულებული გახდა. გარიგების ღირებულებამ 2.5 მილიარდი ფუნტი შეადგინა, ამასთან, გარანტირებული იყო, რომ კლუბში დამატებით 1.5 მილიარდი ფუნტი უნდა ჩადებულიყო.