წელს 14-15%-ის ფარგლებში ველოდებით საბანკო დაკრედიტების ზრდას - დავით უტიაშვილი

ეროვნულ ბანკში ელიან, რომ მიმდინარე წელს დაკრედიტების ზრდის ტემპი 14-15%-ის ფარგლებში იქნება.

როგორც BMG-სთან სებ-ის ფინანსური სტაბილურობის დეპარტამენტის უფროსი აცხადებს, მაღალი ეკონომიკური ზრდის და ინფლაციის პირობებში, შესაძლოა, ბანკების საკრედიტო პორტფელის ზრდის ტემპი უფრო მაღალიც იყოს.

ამასთან, დავით უტიაშვილის თქმით, საყურადღებოა ანაბრების ზრდის დინამიკა, რომელიც ამ ეტაპზე სესხების ზრდის ტემპს უსწრებს.

“სხვა თანაბარ პირობებში, გრძელვადიან პერიოდში, მიგვაჩნია, რომ ჩვენს ბაზარზე დაკრედიტების ტემპი 13-14% უნდა იყოს, ესაა მდგრადი დონე. თუმცა იმ შემთხვევაში, როდესაც არის შედარებით მაღალი ეკონომიკური ზრდა, მარტში 10.7%-იანი ზრდა დაფიქსირდა, ცხადია, ამან შესაძლოა, დააჩქაროს საკრედიტო აქტივობა. თუმცა ვფიქრობთ, რომ სხვა თანაბარ პირობებში, დაახლოებით 14-15%-ის ფარგლებში არის წელს საკრედიტო აქტივობა მოსალოდნელი.

ასევე საინტერესო დინამიკა გვაქვს ანაბრებში, რომელიც დაახლოებით 18%-ით იზრდება მიმდინარე პერიოდში, ესეც მნიშვნელოვანი ფაქტორი არის, როდესაც ანაბრებში ასეთი ზრდა გვაქვს. ცხადია, ესეც ეხმარება, როგორც საკრედიტო აქტივობას, ასევე ეკონომიკურ ზრდას და აქ საინტერესო დინამიკა გვაქვს”, - განაცხადა დავით უტიაშვილმა.

ცნობისთვის, ბოლო თვეების განმავლობაში ბანკებში საკრედიტო აქტივობა შედარებით დაჩქარდა და მარტის მდგომარეობით 15%-ს მიაღწია.