წელს საქართველომ რუსეთიდან 36%-ით მეტი ხორბალი და 347%-ით მეტი სიმინდი იყიდა|იმპორტის სტატისტიკა

რუსეთი საქართველოსთვის მარცვლეულის (ხორბლისა და სიმინდის) მთავარ მომწოდებლად რჩება. მიმდინარე წელს საქართველომ 182 366 ტონა რუსული ხორბლის და სიმინდის იმპორტში 47.3 მლნ დოლარი გადაიხადა. საქსტატის ოფიციალური მონაცემებით, იანვარ-ივნისში რუსეთიდან ორივე პროდუქტის იმპორტი მკვეთრადაა გაზრდილი.

ხორბლის იმპორტი

2026 წლის პირველ ნახევარში საქართველოში ხორბლის ჯამური იმპორტი შემცირდა, თუმცა რუსეთიდან იმპორტი გაიზარდა. წლის პირველ ნახევარში ქვეყანამ სულ 45.3 მლნ დოლარის 174 880 ტონა ხორბალი და მესლინი იყიდა, რაც წლის ჭრილში 5%-იანი კლებაა როგორც რაოდენობრივ, ისე თანხობრივ გამოხატულებაში.

იმპორტის კლება ყაზახეთს უკავშირდება, საიდანაც წელს 89%-ით ნაკლები რაოდენობა შემოვიდა.

საპირისპიროდ, ზრდა ფიქსირდება რუსეთიდან, რომელზეც ხორბლის მთლიანი იმპორტის 90%-ზე მეტი მოდის. რუსეთიდან 6 თვეში 41.8 მლნ დოლარის 160 615 ტონა ხორბალია იმპორტირებული, რაც თანხობრივად 30%-ით, ხოლო მოცულობაში 36%-იანი წლიური ზრდაა.

წელს იმპორტის სტატისტიკა ქვეყნების მიხედვით ასეთია:

• რუსეთი - $41.8 მლნ/160 615 ტონა; • ყაზახეთი - $1.8 მლნ/7 839 ტონა; • არაბთა გაერთიანებული საამიროები - $1.6 მლნ/6 399 ტონა.

სიმინდის იმპორტი

რაც შეეხება სიმინდის იმპორტს, წელს საქართველომ სულ 11.1 მილიონი დოლარის 23 413 ტონა პროდუქტი იყიდა. რაოდენობრივი ზრდა 276%-ია, ხოლო თანხობრივი 89%, რაც იმპორტის გაიაფებაზე მეტყველებს.

მკვეთრი მატება რუსეთს უკავშირდება. 2026 წლის მთლიანი იმპორტირებული პროდუქტიდან 93% სწორედ რუსეთზე მოდის.

6 თვეში რუსეთიდან იმპორტმა მიაღწია 21 751 ტონას (წლიური ზრდა 347%) და 5.5 მლნ დოლარს (წლიური ზრდა 328%), რაც 300%-ზე მეტი ზრდაა როგორც რაოდენობრივად, ისე მოცულობით.

სიმინდის იმპორტიორი ძირითადი ქვეყნები, საიდანაც იმპორტი 100 ტონას აჭარბებს, ასეთია:

• რუსეთი - $5.5 მლნ/21 751 ტონა; • თურქეთი - $2.9 მლნ/751 ტონა; • ეგვიპტე - $92.1 ათასი/224 ტონა; • არგენტინა - $113.4 ათასი/208 ტონა; • საფრანგეთი - $869.3 ათასი/149 ტონა; • რუმინეთი - $683 ათასი/122 ტონა; • ავსტრია - $614 ათასი/109 ტონა.