წინა კვირასთან შედარებით, საავიაციო საწვავზე ფასი 10%-ით შემცირდა

საჰაერო ტრანსპორტის საერთაშორისო ასოციაციის (IATA) ინფორმაციით, წინა კვირასთან შედარებით, საწვავზე ფასი 10%-ით შემცირდა და ბარელზე 163 დოლარი შეადგინა. კვირის ჭრილში კლების მიუხედავად, ირანის ომის გამო საწვავი კვლავ გაძვირებულია და წინა წელთან შედარებით 81%-იან ზრდას აჩვენებს.

IATA-ს მიერ გამოქვეყნებული ფასი არის საშუალო მაჩვენებელი და რეგიონების მიხედვით განსხვავდება. საჰაერო ტრანსპორტის საერთაშორისო ასოციაციის ცნობით, ევროპაში საწვავზე ფასი 165 დოლარს აღწევს, აზიის საშუალო ფასი 159 დოლარია, ჩრდილოეთ ამერიკაში კი ბარელი 163 დოლარი ღირს.

გაძვირებული საწვავის გამო, გლობალური ავიაცია კრიზისშია, რადგან ავიაკომპანიების ხარჯების 40%-ზე მეტი სწორედ საწვავზე მოდის. საწვავის დაზოგვის მიზნით, ევროპის ერთ-ერთ ყველაზე მსხვილ ავიაკომპანიას Lufthansa-ს 20 ათასამდე რეისის გაუქმებაც მოუწია.

არც პროგნოზებია სახარბიელო. საჰაერო ტრანსპორტის საერთაშორისო ასოციაციის ხელმძღვანელი ამბობს, რომ ჰორმუზის სრუტის საკითხი რომც მოგვარდეს, ლოგისტიკური ჯაჭვების აღდგენას თვეები დასჭირდება. ეს ნიშნავს, რომ ავიაციისთვის ყველაზე აქტიურ ზაფხულის პერიოდში სექტორი კრიზისში იქნება.

ვრცლად ამ თემაზე: გაორმაგებული ფასი საწვავზე - როგორ აისახა გლობალური კრიზისი ქართულ საავიაციო ბაზარზე?