უბრუნდება თუ არა იტალია ბირთვულ ენერგიას?

იტალიის მთავრობამ ქვეყანაში ბირთვული ენერგეტიკის ინფრასტრუქტურის აღსადგენად საკანონმდებლო ბაზის მომზადება დაიწყო. არსებული ინფორმაციით, პრემიერ-მინისტრ ჯორჯა მელონის ინიციატივა მიზნად ჩარჩო დოკუმენტის დამტკიცებას მიმდინარე ზაფხულშივე ისახავს. როგორც ოფიციალურ რომში განმარტავენ, ეს ნაბიჯი ენერგეტიკული უსაფრთხოების განმტკიცებასა და ელექტროენერგიის გაზრდილი ტარიფების შემცირებას შეუწყობს ხელს. ამასთან, ახალი სტრატეგიით მოხერხდება წიაღისეული საწვავის ბაზარზე არსებული არასტაბილურობისა და გეოპოლიტიკური შოკებისაგან თავის დაცვა.

აღსანიშნავია, რომ ახალი სამთავრობო გეგმა აქცენტს იმ მცირე მოდალურ რეაქტორებზე აკეთებს, რომლებიც ტრადიციულ ანალოგებთან შედარებით კომპაქტური ზომით გამოირჩევა. დასახელებული ტექნოლოგია, თეორიულად, უფრო სწრაფად და იაფად აშენებადია. Politico-ს ცნობით, თუ მელონის გეგმა საბოლოოდ ამოქმედდება, იტალია მსგავსი ელექტროსადგურიდან დენის მიღებას 15 წლის შემდეგ პირველად შეძლებს. საყურადღებოა ვიცე-პრემიერ მატეო სალვინის პროგნოზიც, რომლის თანახმადაც პირველი რეაქტორები ექსპლუატაციაში 2032 წლისთვის შევა. თუმცა ანალიტიკოსები ამ პროგნოზს ზედმეტად ოპტიმისტურად მიიჩნევენ და სექტორში არსებულ ფინანსურ რისკებზე მიუთითებენ.

რაც შეეხება მთავარ გამოწვევებს, ანალიტიკოსები სამართლებრივი ჩარჩოს მომზადებისას ქვეყანაში საზოგადოებრივი პროტესტის ტალღის დაწყებას მოელიან, რადგან ბირთვული ენერგიის მიმართ იტალიაში არაერთგვაროვანი დამოკიდებულებაა. ექსპერტების შეფასებით, იტალიის პოლიტიკური სისტემის არასტაბილურობა კიდევ ერთი ფაქტორი იქნება, რაც პროექტის განხორციელებას კიდევ უფრო შეაფერხებს. მაგალითისთვის, თუ მოქმედი მთავრობა ხელშეკრულებებს გააფორმებს, შესაძლოა, მომდევნო კაბინეტმა ყველა გადაწყვეტილება გააუქმოს. მნიშვნელოვანია ითქვას, რომ სერიოზულ ბარიერს ადგილობრივი თემების წინააღმდეგობაც ქმნის. რეგიონულ სასამართლოებში ადმინისტრაციულმა დავებმა შესაძლოა სტრატეგიული ინფრასტრუქტურის მშენებლობა წლებით შეაჩეროს.

ამასთან, სპეციალისტები მიუთითებენ იტალიის თავისებურ "პარადოქსზე" - ფაქტზე, რომ ქვეყანა ელექტროენერგიის უდიდესი ნაწილის იმპორტს საფრანგეთიდან ახორციელებს. თანაც იმ ფონზე, როცა ოფიციალური პარიზი რომს დენს სწორედ ბირთვული რეაქტორების გამოყენებით აწვდის.

ცნობისთვის, იტალიამ ბირთვული რეაქტორები 1987 წელს რეფერენდუმის საფუძველზე, ჩერნობილის კატასტროფის შემდგომ შეაჩერა. მოგვიანებით, სილვიო ბერლუსკონის კაბინეტის მცდელობა სექტორის აღდგენის თაობაზე, 2011 წელს ფუკუსიმას ავარიის ფონზე გამართულმა კიდევ ერთმა რეფერენდუმმა დაბლოკა.