UBS-ის წმინდა მოგება 1 წელიწადში 80%-ით გაიზარდა

შვეიცარიული ფინანსური ინდუსტრიის გიგანტმა, UBS-მა 2026 წლის პირველი კვარტალის შედეგები გამოაქვეყნა და ანალიტიკოსების მოლოდინებს გადააჭარბა. კომპანიის წმინდა მოგებამ $3 მილიარდი შეადგინა, რაც გასული წლის ანალოგიურ პერიოდთან შედარებით 80%-ით მეტია.

აღსანიშნავია, რომ ექსპერტები საშუალოდ $2.3 მილიარდიან მოგებას პროგნოზირებდნენ. როგორც ირკვევა, ფინანსური მაჩვენებლების ზრდა ახლო აღმოსავლეთში მიმდინარე ომით გამოწვეულმა საბაზრო მერყეობამ და სავაჭრო შემოსავლების რეკორდულმა მატებამ განაპირობა.

აღსანიშნავია, რომ ბანკის საინვესტიციო მიმართულების შემოსავალი წლიურად 27%-ით გაიზარდა, რაშიც გადამწყვეტი როლი სავაჭრო დეპარტამენტის მიერ გადადგმულმა ნაბიჯებმა ითამაშა. ამასთან, აქტივების მართვის გლობალურმა დეპარტამენტმა $37 მილიარდის მოცულობის ახალი კაპიტალი მოიზიდა.

კომპანიის აღმასრულებელი დირექტორის, სერჯო ერმოტის განცხადებით, ორგანიზაცია შვეიცარიის მთავრობასთან ახალ კაპიტალურ მოთხოვნებზე კონსტრუქციულ დიალოგს გააგრძელებს. მისივე თქმით, რეგულაციების შესაძლო გამკაცრება ბანკის სტრატეგიულ კურსს ვერ შეცვლის.

კვარტალური შედეგის გამოქვეყნების შემდეგ ცნობილი გახდა ასევე, რომ Credit Suisse-ის ინტეგრაციის პროცესი წლის ბოლომდე დასრულდება, რაც ბანკს ხარჯების დაზოგვისა და ეფექტიანობის გაზრდის საშუალებას მისცემს. ამჟამად კუმულაციურმა დანაზოგმა $11.5 მილიარდს მიაღწია.

შეგახსენებთ, რომ UBS-მა Credit Suisse-ი 2023 წელს, სახელმწიფოს შუამავლობით განხორციელებული გადაუდებელი გარიგების ფარგლებში შეიძინა. ეს ნაბიჯი Credit Suisse-ის კოლაფსის თავიდან ასაცილებლად გადაიდგა.