უკრაინა მზად არის ორივე მხარისთვის სარგებლის მომტანი ურთიერთობებისთვის ნაბიჯები გადადგას - ზელენსკი

უკრაინის პრეზიდენტი ვოლოდიმირ ზელენსკი საქართველოს დამოუკიდებლობის დღეს ულოცავს და აცხადებს, რომ უკრაინა მზად არის ურთიერთობების ნორმალიზების მიმართულებით ნაბიჯები გადადგას.

„ვულოცავ საქართველოსა და ქართველ ხალხს დამოუკიდებლობის დღეს. ჩვენს ორ ერს აკავშირებს ხანგრძლივი კავშირები და გვაქვს თავისუფლებისა ღირსების საერთო გაგება. საქართველოს ვუსურვებ მშვიდობას, ერთიანობას, სიმტკიცესა და კეთილდღეობას. იმედს ვამყარებთ ორივე მხარისთვის სარგებლობის მომტან ურთიერთობაზე და უკრაინა მზად არის გადადგას ნაბიჯები ამ მიმართულებით", - წერს ზელენსკი X-ზე.

15 მაისს მოლდოვაში მიმდინარე ევროპის საბჭოს მინისტრთა კომიტეტის 135-ე სესიის ფარგლებში, საგარეო საქმეთა მინისტრი მაკა ბოჭორიშვილი უკრაინის საგარეო საქმეთა მინისტრს ანდრი სიბიჰას შეხვდა. საქართველოს საგარეო საქმეთა სამინისტროს მიერ გავრცელებული ინფორმაციით, შეხვედრის ფარგლებში საუბარი შეეხო საქართველოს მხრიდან უკრაინის მიმართ თანმიმდევრულ პოლიტიკურ და ჰუმანიტარულ მხარდაჭერას. ამასთან, ქართულმა მხარემ ხაზი გაუსვა საქართველო-უკრაინის ურთიერთობებში არსებულ გამოწვევებს, უკრაინის ხელისუფლების მხრიდან ბოლო წლებში გადადგმულ ნაბიჯებს და იმ პოზიციებს, რაც აბრკოლებს ქვეყნებს შორის ურთიერთობების ნორმალიზებას. მხარეებმა დაადასტურეს დიპლომატიური ურთიერთობების გაჯანსაღების მნიშვნელობა და დიალოგის გაგრძელების მზაობა.

მანამდე, 4 მაისს, სომხეთში, ევროპის პოლიტიკური გაერთიანების (EPC) სამიტის ფარგლებში, შეხვედრა გაიმართა ზელენსკისა და პრემიერ-მინისტრს ირაკლი კობახიძეს შორის.