უკრაინის პარლამენტმა ევროკავშირის €90-მილიარდიანი ფინანსური დახმარება დაამტკიცა

უკრაინის პარლამენტმა ევროკომისიის მიერ შეთავაზებული €90 მილიარდის მოცულობის ფინანსური მხარდაჭერის პაკეტი დაამტკიცა. როგორც ირკვევა, მიღებული სესხი მეტწილად ქვეყნის თავდაცვისუნარიანობის შენარჩუნებას მოხმარდება.

"მადლობელი ვარ იმ დეპუტატების, რომლებმაც ევროკავშირთან შეთანხმების რატიფიცირება ასე ოპერატიულად განახორციელეს. ეს ერთ-ერთი ყველაზე მნიშვნელოვანი კენჭისყრა იყო ჩვენი ქვეყნისთვის", - განაცხადა უკრაინის პრეზიდენტმა, ვოლოდიმირ ზელენსკიმ.

არსებული ინფორმაციით, ფინანსური დახმარება ორწლიან პერიოდზე გადანაწილდება და მის ფარგლებში უკრაინა წლიურად €45 მილიარდს ($49 მლრდ.) მიიღებს. გამოყოფილი თანხის დაახლოებით ორი მესამედი თავდაცვის ხარჯებს მოხმარდება, ხოლო დარჩენილი ნაწილით სახელმწიფო ბიუჯეტი დაფინანსდება. მნიშვნელოვანია ითქვას, რომ კიევს სესხის ძირითადი თანხის დაფარვა მხოლოდ რუსეთისგან რეპარაციების მიღების შემთხვევაში მოუწევს. ეს კი, ანალიტიკოსების შეფასებით, ნაკლებად სავარაუდოდ მიიჩნევა. აღსანიშნი ფაქტია, რომ ევროკავშირი აღებული სესხის საპროცენტო განაკვეთის დაფარვას საკუთარ თავზე აიღებს.

ევროკომისიის პრეზიდენტის, ურსულა ფონ დერ ლაიენის განცხადებით, ფინანსური ტრანშის პირველი ნაწილი კიევში მიმდინარე წლის ივნისში ჩაირიცხება.

შეგახსენებთ, ევროპულმა საბჭომ სესხის დამტკიცება აპრილში, უნგრეთისა და სლოვაკეთის მხრიდან ვეტოს მოხსნის შემდეგ მოახერხა. ამ შეთანხმებამ დაასრულა ის მრავალთვიანი პოლიტიკური დაპირისპირება, რომლის დროსაც უკრაინისთვის უმსხვილესი ფინანსური პაკეტის მიწოდება ვერ ხერხდებოდა.

ცნობისთვის, ბუდაპეშტი და ბრატისლავა თანხმობის სანაცვლოდ უკრაინისაგან "დრუჟბას" დაზიანებული ნავთობსადენის აღდგენას ითხოვდნენ. საუბარია იმ ინფრასტრუქტურაზე, რომლითაც რუსული ნავთობი ორივე სახელმწიფოს მიეწოდება.