United-ის და American Airlines-ის შერწყმა გამოირიცხა

United-ის გენერალურმა დირექტორმა, სკოტ კირბიმ განაცხადა, რომ ამერიკული ავიაციის ორ გიგანტს შორის შესაძლო გაერთიანების საკითხი დღის წესრიგიდან მოიხსნა.

კირბის განმარტებით, მოლაპარაკებების ინიციატორი თავად იყო და American Airlines-ის ხელმძღვანელობას გლობალური კონკურენტუნარიანობის გაზრდის მიზნით თანამშრომლობა შესთავაზა. მიუხედავად იმისა, რომ United-ის ხელმძღვანელი მარეგულირებლისგან ნებართვის მიღების კუთხით ოპტიმისტურად იყო განწყობილი, პროცესი American Airlines-ის უარმა შეაჩერა.

როგორც ირკვევა, სკოტ კირბის ხედვა ეყრდნობოდა იდეას, რომ ახალ სუბიექტს უცხოურ ავიაკომპანიებთან კონკურენციაში ლიდერობა უნდა დაებრუნებინა. მისი თქმით, გაერთიანება ორიენტირებული იქნებოდა არა რესურსების შემცირებაზე, არამედ ზრდაზე, ფლოტის მოდერნიზაციასა და მცირე ქალაქებისთვის მომსახურების გაფართოებაზე. თუმცა, American Airlines-მა წინადადებაზე უარი საჯაროდ განაცხადა და აღნიშნა, რომ მსგავსი მასშტაბის გარიგება კონკურენციასა და მომხმარებლებზე უარყოფით გავლენას იქონიებს.

მნიშვნელოვანია ითქვას, რომ შესაძლო შერწყმას ვაშინგტონში მწვავე რეაქცია მოჰყვა. სენატორებმა ელიზაბეთ უორენმა და მაიკ ლიმ საკითხზე ორპარტიული მოკვლევა დაიწყეს, რადგან მიიჩნევენ, რომ "სუპერგადამზიდავის" შექმნა ავიაბილეთების ფასების ზრდასა და მომსახურების ხარისხის გაუარესებას გამოიწვევს. აღსანიშნავია, რომ გარიგების მიმართ ნეგატიური დამოკიდებულება პრეზიდენტმა დონალდ ტრამპმაც გამოხატა. მისი განცხადებით, კონკურენციის პრინციპებიდან გამომდინარე, მას ორი მსხვილი კომპანიის შერწყმა არ მოსწონს.

პარალელურად, პრეზიდენტმა ტრამპმა მხარდაჭერა გამოუცხადა Spirit Airlines-ს, რომელიც ამჟამად მძიმე ფინანსურ მდგომარეობაშია. არსებული ინფორმაციით, ფედერალური მთავრობა აღნიშნული დაბალბიუჯეტიანი გადამზიდავისთვის $500-მილიონიანი დახმარების პაკეტის გამოყოფას განიხილავს. რაც შეეხება United-ს, სკოტ კირბიმ აღნიშნა, რომ კომპანია დამოუკიდებელ სტრატეგიას უბრუნდება და ინვესტიციებს ტექნოლოგიებსა და ინფრასტრუქტურაში გააგრძელებს.

ცნობისთვის, United-ი და American Airlines-ი აშშ-ის ავიაციის "დიდი ოთხეულის" წევრები არიან. სექტორში მსგავსი მასშტაბის შერწყმის მცდელობები ისტორიულად ანტიმონოპოლიური სამსახურების მხრიდან ყოველთვის მკაცრ წინააღმდეგობას აწყდებოდა.