ვალენსიის გადაწყვეტილებით, ქალაქში ტურისტებზე ბინების მხოლოდ 2% გაქირავდება

ვალენსიის ოფიციალურმა პირებმა ქალაქის მასშტაბით დასასვენებელი ბინების რაოდენობის შესაზღუდად ახალი წესები დაამტკიცეს.

ვალენსიის საკრებულოს მიერ დაანონსებული ახალი რეგულაციების თანახმად, ქალაქის თითოეულ უბანსა და რაიონში დასასვენებელი სახლებისა და ბინების რაოდენობა საერთო საცხოვრებელი ფონდის 2%-ს არ უნდა აღემატებოდეს.

ამ ნაბიჯს მიესალმა ქალაქის მერი მარია ხოსე კატალა და აღნიშნა, რომ ვალენსია პირველი ქალაქია ესპანეთში, რომელმაც ტურისტულ საცხოვრებლებზე მსგავსი ლიმიტი დააწესა.

"ეს რეგულაციები გაცილებით ამბიციური სტრატეგიის ნაწილია, რომელიც ქალაქში პარადიგმის შეცვლის ფართო ხედვას ემსახურება.

ჩვენ არ ვართ მხოლოდ მზისა და პლაჟის ქალაქი, რომელიც მასობრივ, დაბალბიუჯეტიან ტურიზმს ეძებს. ჩვენ ვართ ქალაქი, რომელიც ურბანულ ტურისტულ მიმართულებას წარმოადგენს და ბოლო წლების ქაოსი წესრიგში მოგვყავს", - განაცხადა მან.

ტურიზმის მზარდი მაჩვენებლებისა და ე.წ. "ტურისტფლაციის" ფონზე, ვალენსიასა და ესპანეთის სხვა ქალაქებში, მაგალითად ბარსელონაში, ბოლო წლებში მასშტაბური დემონსტრაციები გაიმართა. მომიტინგეები გადატვირთულ ქალაქის ცენტრებსა და უძრავი ქონების ბაზარზე არსებულ ზეწოლას აპროტესტებენ.

ახალი რეგულაციები, ვალენსიის ურბანული დაგეგმარების სტანდარტებში ცვლილებების სახით, საკრებულოს პლენარულ სესიაზე დამტკიცდა.

მერმა კატალამ აღნიშნა, რომ ვალენსია "საცხოვრებელი ქალაქია, სადაც სახლები ადგილობრივებისთვისაა" და რომ ახალი რეგულაციები სახლების 98%-ის მხოლოდ საცხოვრებელი მიზნით გამოყენებას უზრუნველყოფს.

ცვლილებები ასევე ადგენს, რომ ტურისტული საცხოვრებლების საერთო რაოდენობა (სასტუმროები, აპარტამენტები თუ სადღესასწაულო გასაქირავებელი ბინები) ქალაქის არცერთ უბანსა და რაიონში არ უნდა აღემატებოდეს რეგისტრირებული მოსახლეობის 8%-ის ეკვივალენტს. გარდა ამისა, საცხოვრებელ ზონებში, პირველ სართულებზე ნებისმიერი ტიპის ტურისტული ობიექტის მაქსიმალური დასაშვები წილი 15% იქნება.