ვაშინგტონმა ირანის ნავთობის სექტორს სანქციები დროებით შეუჩერა
ამერიკის შეერთებულმა შტატებმა ირანის ნავთობის სექტორს სანქციები დროებით შეუჩერა. არსებული ინფორმაციით, ეს ნაბიჯი თეირანთან მოლაპარაკებების განახლების ფონზე მოხდა. ირანული გამოცემა Tasnim-ის ცნობით, ვაშინგტონის ახალი წინადადება მოლაპარაკებების პერიოდში ირანული ნავთობის ექსპორტზე დაწესებული შეზღუდვების გაუქმებას ითვალისწინებს.
აღსანიშნავია, რომ ამერიკული მხარის ახალი ინიციატივა OFAC-ის მიერ ადმინისტრირებულ სანქციებზე დროებითი გამონაკლისის მექანიზმის შექმნას გულისხმობს. საყურადღებოა, რომ ვაშინგტონის ეს წინადადება მოლაპარაკებების დასრულებამდე და საბოლოო შეთანხმების ხელმოწერამდე ნავთობის ექსპორტზე დაწესებული შეზღუდვების მოხსნას ითვალისწინებს.
აქვე უნდა ითქვას, რომ თეირანი ნებისმიერი მდგრადი შეთანხმების ფარგლებში შეზღუდვების სრულ და მუდმივ გაუქმებას კვლავ აქტიურად ითხოვს. ირანული მხარის განცხადებით, ყველა სანქციის მოხსნა ვაშინგტონის მიერ აღებული ვალდებულებების აუცილებელი პირობა იქნება.
ცნობისთვის, რამდენიმე საათის წინ აშშ-ის პრეზიდენტმა დონალდ ტრამპმა თეირანი სოციალურ ქსელში მკაცრად გააფრთხილა. ამერიკელმა ლიდერმა მოლაპარაკებების პროცესის სასწრაფო დაჩქარება მოითხოვა. მისი განცხადებით, ირანისთვის დრო სწრაფად იწურება და თუ ისინი არ დათანხმდებიან თეთრი სახლის მოთხოვნებს, "ქვეყნისაგან არაფერი დარჩება".
BM.GE
წყარო: bm.ge