"ვენახის ნებართვა არ არის მხოლოდ საქართველოში და აქ მოგონილი" - დავით სონღულაშვილი
გარემოს დაცვისა და სოფლის მეურნეობის მინისტრმა დავით სონღულაშვილმა ვენახის გაშენების სახელმწიფო რეგულაციის მნიშვნელობის შესახებ ისაუბრა.
მისი თქმით, ხარისხიანი ღვინის მისაღებად რამდენიმე მნიშვნელოვანი ფაქტორია გასათვალისწინებელი და ვენახის ნებართვა არ არის მხოლოდ საქართველოში და აქ მოგონილი.
„ვენახის ნებართვა არ არის მხოლოდ საქართველოში და აქ მოგონილი. საფრანგეთის, იტალიის, ესპანეთის, ამერიკის, სადაც მევენახეობა არის წარმატებული, ვენახის გაშენებაზე რეგულაციები ბევრად უფრო მკაცრია. წესები საბოლოოდ აისახება ღვინის ხარისხზე და ფასზე. შევადაროთ ერთი ბოთლი ღვინის საშუალო ფასი საფრანგეთის, იტალიის, ესპანეთის და ჩვენი. ეს ფასები მიღებულია ზუსტად იმ წესებით, რა წესებითაც განისაზღვრება ღვინის ხარისხი. ხარისხით დგება საბოლოო ჯამში ღვინის ფასი. ეს არის მოცემულობა“, - აღნიშნა დავით სონღულაშვილმა.
მინისტრის განცხადებით, სამეწარმეო ვენახების შემთხვევაში ძალიან ხშირია მოცემულობა, რომ კახეთში გაშენდა რქაწითელის ვენახები, სადაც ჰექტარზე 30-40 ტონა მოჰყავთ, შაქრიანობა 14-15 გრადუსზე ვერ ადის. ადამიანი უნდა დაიცვა, როდესაც ასეთ ინვესტიციას აკეთებს.
"ყურძენი და ღვინო არ არის მარტო ბიზნესი, დარგი და სექტორი, ეს არის საქართველოს იდენტობის ნაწილი; სახელმწიფო მარტო დარგს კი არ უნდა გაუფრთხილდეს, არამედ იმ იდენტობის ნაწილს უნდა გაუფრთხილდეს, რომელთან ერთადაც იცხოვრა 8000 წელი, ამიტომ არის მნიშვნელოვანი, რომ სწორად გააშენო ვენახი.
თუ გვინდა, რომ ქართული ღვინო მაღალ ხარისხთან იყოს ასოცირებული, მხოლოდ ღვინის ხარისხის კონტროლი და მისი ქიმიური შემადგენლობის განსაზღვრა საკმარისი არ არის, მნიშვნელოვანია წინა ეტაპები. ძალიან მკაცრად დავიწყეთ შიდა ბაზრის ინსპექტირება, ვაკონტროლებთ ჩამოსასხმელ ღვინოსაც, სამწუხაროდ, არაკეთილსინდისიერი მიდგომები ამ მიმართულებითაც არსებობს. ის შედეგი, რაც რეალურად შეგვიძლია დადგეს ერთ ან ორ წელიწადში და რასაც ხშირად სჭირდება ათი წელიწადი. ეს ნიშნავს, რომ გარკვეული გამოწვევები არსებობს. საბოლოო ჯამში, ჩვენი მიზანია ქართული ღვინო ასოცირდებოდეს მაღალ ხარისხთან“, - განაცხადა გარემოს დაცვისა და სოფლის მეურნეობის მინისტრმა.