"ვინარჩუნებთ ოპერაციულ სტაბილურობას და ვაგრძელებთ მგზავრებისთვის დაბალი ტარიფების შეთავაზებას" - Wizz Air-ის განცხადება საწვავის რისკებზე

Wizz Air-ის განცხადებით, ავიაკომპანიას მომარაგებული აქვს საწვავის საჭიროების დაახლოებით 70% მომდევნო 6 თვისთვის და დაახლოებით 60% — 2027 წლის მარტის ბოლომდე, რაც უზრუნველყოფს ხარჯების მკაფიო პროგნოზირებადობას და დაცვას არასტაბილურ გარემოში.

ავიაკომპანია ოფიციალურ განცხადებას ავრცელებს საწვავის ფასების ცვალებადობასთან და კომპანიის ფინანსურ მდგრადობასთან დაკავშირებით და განმარტავს, რომ ინარჩუნებს ოპერაციულ სტაბილურობას და განაგრძობს მგზავრებისთვის დაბალი ტარიფების შეთავაზებას.

“Wizz Air კატეგორიულად უარყოფს ნებისმიერ ვარაუდს იმის შესახებ, რომ ავიაკომპანია მაღალი რისკის წინაშეა საწვავის ფასების ცვალებადობის გამო. ავიაკომპანიას მომარაგებული აქვს საწვავის საჭიროების დაახლოებით 70% მომდევნო 6 თვის განმავლობაში და დაახლოებით 60% — 2027 წლის მარტის ბოლომდე, რაც უზრუნველყოფს ხარჯების მკაფიო პროგნოზირებადობას და დაცვას არასტაბილურ საბაზრო გარემოში.

გარდა ამისა, ჩვენ გვაქვს ინდუსტრიაში ერთ-ერთი ყველაზე ეფექტიანი ხარჯების სტრუქტურა. ავიაკომპანია ოპერირებს ევროპაში ერთ-ერთ ყველაზე ახალგაზრდა საჰაერო ფლოტით, რომლის საშუალო ასაკი 4.5 წელია, ხოლო თვითმფრინავების 75% მიეკუთვნება თანამედროვე A320neo ოჯახს, რომელიც უზრუნველყოფს დაახლოებით 17%-ით ნაკლები საწვავის მოხმარებას წინა თაობებთან შედარებით. ეს სტრუქტურული ეფექტიანობა კიდევ უფრო ამცირებს მოწყვლადობას საწვავის ფასების არასტაბილურობის მიმართ.

ავიაკომპანია ევროპის ქსელის მასშტაბით არ ხედავს რაიმე სტრუქტურულ პრობლემას საწვავის მიწოდებაში. ბოლო პერიოდში ევროპის აეროპორტებში მომხდარი ნებისმიერი შეფერხება იყო იზოლირებული, ხანმოკლე ხასიათის და არანაირი გავლენა არ მოუხდენია ოპერირებაზე — დაგეგმილ ფრენებში არცერთი გაუქმება ან დაგვიანება არ დაფიქსირებულა.

Wizz Air ინარჩუნებს ოპერაციულ სტაბილურობას და განაგრძობს მგზავრებისთვის დაბალი ტარიფების შეთავაზებას, ამავდროულად აფართოებს ქსელს მთელ ევროპაში. ეს ასევე აისახება ავიაკომპანიის ზრდის ტრაექტორიაში - Wizz Air წელს ყველაზე სწრაფად მზარდი ავიაკომპანიაა",- წერია განცხადებაში.

ცნობისთვის, ირანში აშშ-ისა და ისრაელის სამხედრო მოქმედებების დაწყების შემდეგ, საავიაციო საწვავის ფასი 100%-ზე მეტით გაიზარდა, რამაც საავიაციო სექტორს გამოწვევები შეუქმნა.