ვიქნები მკაცრი და შეურიგებელი... ფალსიფიცირებული ღვინის ადგილი საქართველოში არ არის - სონღულაშვილი

გარემოს დაცვისა და სოფლის მეურნეობის მინისტრი აცხადებს, რომ ღვინის ფალსიფიცირების მიმართ, მკაცრი და შეურიგებელი იქნება, რადგან საქართველოში ფალსიფიცირებული ღვინის ადგილი არ არის.

ამის შესახებ დავით სონღულაშვილმა "რუსთავი 2"-ის ეთერში ვენახის გაშენების რეგულირების საკითხზე გამართული დებატებისას განაცხადა.

ის აცხადებს, რომ სამინისტროში სეს-ი და ღვინის ეროვნული სააგენტო ბაზრის მონიტორინგს აქტიურად ახორციელებენ.

„ღვინის ფალსიფიკაციასთან ვიქნები ძალიან მკაცრი, რადიკალური და შეურიგებელი - ზუსტად ასეთი მიდგომა მაქვს მეც და მთელ უწყებას. პროცესი სურსათის ეროვნული სააგენტოდან იწყება და ღვინის ეროვნული სააგენტოთი მთავრდება. არ გადის თვე, რომ არ ჩატარდეს საკონტროლო შესყიდვები, როგორც რესტორნებსა და დარბაზებში, ისე ქსელურ მარკეტებში. პროდუქციის მთლიანად ამოღებისა და კონფისკაციის არაერთი შემთხვევა გვქონია.

ამ საკითხთან დაკავშირებით ვიქნები მკაცრი, შეურიგებელი და ძალიან რადიკალური, რადგან ფალსიფიცირებული ღვინის ადგილი საქართველოში არ არის. ხარისხიანი ღვინის მისაღებად კომპლექსურად ვატარებთ სხვადასხვა რეფორმას - დაწყებულს რთველის პროცესით და დამთავრებულს ვენახის გაშენებით.

შარშან გვქონდა პირველი საპილოტე პროექტი, სადაც განვსაზღვრეთ კონკრეტული შაქრიანობის გრადუსი და მოხდა ყურძნის ხარისხობრივი გრადაცია. წელს კონტროლი კიდევ უფრო მეტად გავამკაცრეთ და მკაფიოდ ვამბობთ: რომელია მაღალი ხარისხის ღვინო, რომელი - საშუალო და ა.შ.

17 გრადუსამდე შაქრიანობის ყურძენი წელს კატეგორიულად ვამბობთ, რომ 30 თეთრად ჩაბარდება, რადგან არ შეიძლება მას ერქვას ყურძენი და გამოყენებულ იქნეს ღვინისთვის. თუ ვინმეს საკუთარი მოხმარებისთვის ან საშამპანურე მასალად სურს - კი ბატონო, მაგრამ იქ, სადაც სახელმწიფოა პასუხისმგებელი და სადაც სასმელს „ღვინო“ უნდა ერქვას, სტანდარტები მკაცრად არის განსაზღვრული. დანარჩენი პროცესი იქნება მკაცრად კონტროლირებული და თითოეული მევენახე ანაზღაურებას საკუთარი შრომისა და ხარისხის შესაბამისად მიიღებს“, - აცხადებს დავით სონღულაშვილი.