EU რუსეთს მოუწოდებს მალაიზიური ავიახაზების თვითმფრინავის ჩამოგდებაზე პასუხისმგებლობა იკისროს
ევროკავშირი განცხადებას ავრცელებს 2014 წელს უკრაინაში ჩამოგდებული Malaysia Airlines-ის Boeing 777-ის ჩამოგდებიდან მეთორმეტე წლისთავთან დაკავშირებით.
"მალაიზიის ავიახაზების“ MH17 რეისის ჩამოგდების მე-12 წლისთავზე, ევროკავშირმა კიდევ ერთხელ მოუწოდა რუსეთს, აღიაროს პასუხისმგებლობა ამ ტრაგედიაზე. ევროსაბჭომ თანაგრძნობა გამოუცხადა მსხვერპლთა ოჯახებსა და ახლობლებს", - ნათქვამია ინფორმაციაში.
2014 წლის 17 ივლისს, რუსეთის და პრორუსული ძალების მიერ ოკუპირებული დონეცკის ოლქის საჰაერო სივრცეში სამოქალაქო თვითმფრინავის ჩამოგდებას 298 უდანაშაულო ადამიანის, მათ შორის 80 ბავშვის, სიცოცხლე ემსხვერპლა. რეისი ამსტერდამიდან კუალა-ლუმპურში მიფრინავდა.
ევროსაბჭოს განცხადებაში აღნიშნულია, რომ ევროკავშირი იზიარებს ადამიანის უფლებათა ევროპული სასამართლოს და სამოქალაქო ავიაციის საერთაშორისო ორგანიზაციის 2025 წლის გადაწყვეტილებებს, სადაც რუსეთი პასუხისმგებლად ცნეს რეისის ჩამოგდებასა და 298 ადამიანის დაღუპვაზე.
2025 წლის აგვისტოში ავსტრალიამ და ნიდერლანდებმა რუსეთს მოსთხოვეს მათთან კეთილსინდისიერი მოლაპარაკებების დაუყოვნებლივ დაწყება, რათა სწრაფად მიეღწიათ შეთანხმებისთვის ზიანის ანაზღაურებისა და სამართლებრივ შედეგებთან დაკავშირებით. რუსეთს ამ მოთხოვნაზე არ უპასუხია.
ჰააგის სასამართლომ, 2022 წლის ნოემბერში, თვითმფრინავის ჩამოგდებისთვის დამნაშავეებს დაუსწრებლად მიუსაჯა უვადო თავისუფლების აღკვეთა და დაღუპულთა ოჯახებისთვის ჯამში 16 მილიონი ევროს გადახდა დააკისრა.
2026 წლის თებერვალში, ადამიანის უფლებათა ევროპულმა სასამართლომ უარყო უკრაინის წინააღმდეგ შეტანილი საჩივარი, რომელშიც უკრაინას ეკისრებოდა ბრალი საბრძოლო ზონის თავზე საჰაერო სივრცის არდახურვის გამო.