გია ხუხაშვილი ჯორბენაძის საქმეზე მისი გამოკითხვის გადაწყვეტილებას ტრაგიკომედიას უწოდებს

პოლიტოლოგ გია ხუხაშვილის განცხადებით, ლაზარე ჯორბენაძის გარდაცვალების საქმეზე მისი გამოკითხვაზე დაბარება გაუგებარია, რადგან მას გარდაცვლილის შესახებ კონკრეტული კომენტარი არ გაუკეთებია და მისი არსებობის შესახებაც მხოლოდ გარდაცვალების შემდეგ შეიტყო.

ჟურნალისტებთან საუბრისას ხუხაშვილმა აღნიშნა, რომ საგამოძიებო უწყებებს ოცნების ყოფილი პრემიერ-მინისტრის, ირაკლი ღარიბაშვილის წერილის შემდეგ ირაკლი კობახიძე და მამუკა მდინარაძე უნდა დაებარებინათ.

„ჯორბენაძის არსებობა საერთოდ მისი გარდაცვალების შემდეგ გავიგე. მე ჯორბენაძეზე კონკრეტულად კომენტარი არ გამიკეთებია, ზოგადად ვილაპარაკე თვითმკვლელობებზე, სადაც არსებობს კითხვები. აქ ახლა მე კი არ უნდა ვიდგე, უნდა იდგნენ კობახიძე და მდინარაძე, რადგან მათ დაადო ხელი ღარიბაშვილმა, მაგრამ მათ კი არ იბარებენ, მე მიბარებენ და ახლა ეს ხომ ტრაგიკომედიაა და მეტი არაფერი“, — განაცხადა გია ხუხაშვილმა.