ყაველაშვილმა მოსამართლედ ზურაბიშვილის კონსტიტუციის დამრღვევად მცნობის შვილი დანიშნა

მიხეილ ყაველაშვილმა საკონსტიტუციო სასამართლოს მოსამართლედ გოგა კიკილაშვილი დანიშნა. ინფორმაციას პრეზიდენტის ადმინისტრაცია ავრცელებს.

გოგა კიკილაშვილი პოსტზე გიორგი კვერენჩხილაძეს შეცვლის, რომელსაც 10-წლიანი უფლებამოსილების ვადა 2 ოქტომბერს ეწურება.

ადმინისტრაციის ცნობით, კონსტიტუციის მე-60 მუხლის შესაბამისად, საკონსტიტუციო სასამართლოს 9 მოსამართლიდან 3-ს პრეზიდენტი ნიშნავს, 3-ს პარლამენტი ირჩევს, ხოლო 3-ს უზენაესი სასამართლო ამწესებს.

ახლადდანიშნული მოსამართლე 2023 წლის ოქტომბრიდან იუსტიციის უმაღლესი საბჭოს არამოსამართლე წევრი იყო. იგი საკონსტიტუციო სასამართლოს ყოფილი მოსამართლის, ხვიჩა კიკილაშვილის შვილია - იმ მოსამართლის, რომელმაც სალომე ზურაბიშვილი კონსტიტუციის დამრღვევად ცნო. ხვიჩა კიკილაშვილმა თანამდებობა პირადი განცხადების საფუძველზე 2025 წლის 1 აპრილს დატოვა.