სახალხო დამცველის აპარატი პატიმარ გიორგი დავითაძის ადვოკატის განცხადებას უარყოფს

სახალხო დამცველის აპარატი ავრცელებს განცხადებას, რომელშიც უარყოფს მსჯავრდებულ გიორგი დავითაძის ადვოკატის მტკიცებას, თითქოს პატიმარმა ექსპერტიზის ჩატარებაზე უარი ომბუდსმენის წარმომადგენლის რეკომენდაციით თქვა.

„მსჯავრდებულის ადვოკატის მიერ გავრცელებული ინფორმაცია, თითქოს სახალხო დამცველის რწმუნებულმა მსჯავრდებულს ექსპერტიზის ჩატარების მიზანშეუწონლობის შესახებ რჩევა მისცა, არ შეესაბამება სინამდვილეს,“ — აღნიშნულია განცხადებაში. ომბუდსმენის განმარტებით, არსებობს პატიმრის ხელმოწერით დადასტურებული დოკუმენტი, სადაც დავითაძე აცხადებს, რომ ექსპერტიზის ჩატარების საკითხზე კონსულტაციას საკუთარ ადვოკატთან გაივლიდა.

გიორგი დავითაძე აცხადებს, რომ მასზე პენიტენციურ დაწესებულებაში სექსუალურად იძალადეს, რასაც სპეციალური პენიტენციური სამსახური უარყოფს.

მანამდე, 8 ოქტომბერს, დავითაძის ადვოკატმა დარეჯან სულაშვილმა განაცხადა, რომ 2025 წლის დეკემბერში, სახალხო დამცველის წარმომადგენელთან შეხვედრისას, პატიმარმა თავად მოითხოვა ექსპერტიზა. თუმცა, ადვოკატის მტკიცებით, ომბუდსმენის წარმომადგენელმა განუმარტა, რომ დაზიანებების დადგენა მხოლოდ ინციდენტიდან 72 საათის განმავლობაში იყო შესაძლებელი, რის გამოც, დროის გასვლის მიზეზით, ექსპერტიზა აღარ ჩატარდა.