კობახიძე: ივანიშვილისთვის აშშ-ის სანქციები უინტერესოა, მთავარი პარტნიორობის აღდგენაა

,,ოცნების" პრემიერ-მინისტრ ირაკლი კობახიძის განცხადებით, არც „ქართული ოცნების“ საპატიო თავმჯდომარე ბიძინა ივანიშვილისთვის და არც მმართველი გუნდისთვის აშშ-ის სანქციების საკითხი საინტერესო არ არის. მისი თქმით, ერთადერთი პრიორიტეტი ვაშინგტონთან სტრატეგიული პარტნიორობის აღდგენაა, რაზეც ხელისუფლება აქტიურად მუშაობს და ამერიკული მხარისგან შემხვედრ ნაბიჯებს ელოდება.

კობახიძემ ივანიშვილის მიმართ 2024 წლის 27 დეკემბერს დაწესებულ სანქციებს „წინა ადმინისტრაციის აბსურდი“ უწოდა და აღნიშნა, რომ ეს საკითხი ნიუ-იორკში აშშ-ის პრეზიდენტ დონალდ ტრამპთან და სახელმწიფო მდივან მარკო რუბიოსთან ხანმოკლე გასაუბრების დროსაც დააყენა.

ცნობისთვის, ვაშინგტონმა 2009 წლის სტრატეგიული პარტნიორობის ქარტიის მოქმედება 2024 წლის ნოემბერში შეაჩერა, ხოლო დეკემბერში ივანიშვილს დემოკრატიული ინსტიტუტებისთვის ძირის გამოთხრისა და ქვეყნის ევროატლანტიკური კურსიდან გადაყვანის ბრალდებით სანქციები დაუწესა. მიუხედავად იმისა, რომ საქართველოს ხელისუფლება 2025 წლიდან ურთიერთობების „სუფთა ფურცლიდან“ აღდგენას ითხოვს, აშშ-ის სანქციები ძალაში რჩება.