ევროკავშირი პუტინთან მოლაპარაკებებისთვის წარმომადგენელს ეძებს: ფავორიტი ალექსანდერ სტუბია
ევროკავშირში აქტიურად განიხილება საკითხი, თუ ვინ წარადგენს ორგანიზაციას ვლადიმერ პუტინთან შესაძლო მოლაპარაკებებზე. Politico-ს ცნობით, ევროპელი დიპლომატების მიერ განხილულ კანდიდატებს შორის ფავორიტი ფინეთის პრეზიდენტი ალექსანდერ სტუბია.
ევროკავშირიდან წარმომადგენლის ძიების საკითხი განსაკუთრებით აქტუალური ამ კვირაში მას შემდეგ გახდა, რაც აშშ-ის პრეზიდენტის სპეცწარმომადგენელმა სტივ უიტკოფმა რუსეთში ვიზიტისას პუტინს დონალდ ტრამპისა და ვოლოდიმირ ზელენსკის მონაწილეობით სამმხრივი სამიტის გამართვა შესთავაზა. არსებულ ვითარებაზე საუბრისას ჩეხეთის პრეზიდენტმა პეტრ პაველმა აღნიშნა:
„პრეზიდენტი პუტინი ევროკავშირს არ აღიარებს ავტორიტეტად. მას არ სურს ურსულა ფონ დერ ლაიენთან საუბარი, ის არ ესაუბრება კაია კალასს. მან შეწყვიტა კომუნიკაცია სხვა ევროპელ ლიდერებთან, კერძოდ, ემანუელ მაკრონთან“.
პაველმა ხაზი გაუსვა, რომ ევროპამ უნდა განსაზღვროს ლიდერი, რომელსაც სხვები მორიგების მანდატს მიანიჭებენ. ამ ფონზე, ალექსანდერ სტუბის სასარგებლოდ ორი მთავარი ფაქტორი მუშაობს: მას ტრამპთან ევროპელ ლიდერებს შორის საუკეთესო ურთიერთობა აქვს, ხოლო ფინეთს რუსეთთან 1 300-კილომეტრიანი საზღვარი და ურთიერთობის მრავალწლიანი გამოცდილება აკავშირებს.
ფორმულა
წყარო: formulanews.ge