ნიდერლანდები უკრაინას არასამხედრო დახმარების სახით 1.2 მილიარდ ევროს გამოუყოფს

ნიდერლანდების მთავრობა მომდევნო სამი წლის განმავლობაში უკრაინას არასამხედრო დახმარების სახით 1.2 მილიარდ ევროს გამოუყოფს. დახმარება უკრაინის აღდგენისა და რეკონსტრუქციის მხარდაჭერას, ასევე ნიდერლანდური ბიზნესისთვის შესაძლებლობების გაფართოებას ისახავს მიზნად.

ნიდერლანდების საგარეო ვაჭრობისა და განვითარების თანამშრომლობის ხელმძღვანელმა განაცხადა, რომ დახმარების ახალი პაკეტი ენერგეტიკის, წყალმომარაგებისა და ბიზნესის მხარდაჭერის სექტორებზეა ორიენტირებული.

"უკრაინა ინტენსიური თავდასხმების ქვეშ იმყოფება და ძალიან მძიმე ზამთრისთვის ემზადება. ჩვენი საერთო უსაფრთხოებისთვის ასევე სასიცოცხლოდ მნიშვნელოვანია, რომ უკრაინელების მხარდაჭერა გავაგრძელოთ, რათა მათ ბრძოლის გაგრძელება შეძლონ. სწორედ ამიტომ ზრდის მთავრობა ახლა მხარდაჭერას", - ნათქვამია განცხადებაში.

გარდა ამისა, ნიდერლანდები უკრაინის სამხედრო მხარდაჭერას აძლიერებს და კიევს დამატებით 500 მილიონი ევროს ღირებულების სამხედრო დახმარების პაკეტს გადასცემს. ამის შესახებ ნიდერლანდების პრემიერ-მინისტრმა რობ იეტენმა უკრაინის პრეზიდენტ ვოლოდიმირ ზელენსკისთან გამართული ერთობლივი პრესკონფერენციის დროს განაცხადა.

იეტენის განცხადებით, ახალი დახმარების პაკეტი, სხვა შეიარაღებასთან ერთად, საჰაერო თავდაცვის საშუალებებსა და დრონებს მოიცავს. აღნიშნული აღჭურვილობა უკრაინას რუსეთის უწყვეტი საჰაერო თავდასხმებისგან დაცვაში უნდა დაეხმაროს.