ღაზაში ისრაელის დარტყმებს ოთხი ადამიანი ემსხვერპლა, მათ შორის ჰამასის წევრი და მოზარდი გოგონა

ღაზის სექტორში ისრაელის სამხედრო დარტყმებს სულ მცირე ოთხი ადამიანი ემსხვერპლა, მათ შორის ჰამასის უსაფრთხოების სამსახურის წევრი და არასრულწლოვანი გოგონა. ინფორმაციას ღაზის ჯანდაცვისა და უსაფრთხოების სამსახურის წარმომადგენლები ავრცელებენ.

ღაზის სამხრეთ ნაწილში, ხან-იუნისის დასავლეთით, ისრაელის ავიაიერიშის შედეგად იძულებით გადაადგილებულ პირთა კარავი დაიბომბა. ნასერის საავადმყოფოს ინფორმაციით, სამედიცინო დაწესებულებაში სამი ადამიანი გარდაცვლილი მიიყვანეს, რამდენიმე დაშავებულს კი შესაბამისი დახმარება აღმოუჩინეს.

ჰამასის შინაგან საქმეთა სამინისტროს ცნობით, საჰაერო დარტყმის შედეგად დაიღუპა შიდა უსაფრთხოების სამსახურის წევრი მოჰამედ შალუფიც. შემთხვევა ალ-მავასის ტერიტორიაზე მოხდა.

ისრაელის სამხედრო უწყებამ AFP-ს დაუდასტურა, რომ აღნიშნულ ტერიტორიაზე სამხედრო ოპერატიულ პირებზე მიიტანა იერიში, თუმცა დამატებითი დეტალები არ გაუვრცელებია.

კიდევ ერთი თავდასხმის შედეგად მოზარდი გოგონა დაიღუპა. ღაზის სამოქალაქო თავდაცვის წარმომადგენლის, მაჰმუდ ბასალის განცხადებით, ისრაელის დრონი ღაზის ერთ-ერთ პარკში მდებარე კარავს დაესხა თავს.

შეგახსენებთ, რომ ისრაელი 2025 წლის ოქტომბერში აშშ-ის შუამავლობით მიღწეულ ცეცხლის შეწყვეტის შეთანხმებას დათანხმდა. მიუხედავად ამისა, ისრაელის პრემიერ-მინისტრმა ბენიამინ ნეთანიაჰუმ განაცხადა, რომ ჰამასის წინააღმდეგ სამხედრო მოქმედებები გაგრძელდება მანამ, სანამ დაჯგუფება იარაღს არ დაყრის.

2023 წლის 7 ოქტომბერს ჰამასის მიერ ისრაელზე განხორციელებულ თავდასხმას, AFP-ის მონაცემებით, 1 221 ადამიანი ემსხვერპლა, 251 ადამიანი კი მძევლად აიყვანეს და ღაზის სექტორში გადაიყვანეს.

ისრაელმა საპასუხოდ ღაზის სექტორში მასშტაბური სახმელეთო და საჰაერო ოპერაცია დაიწყო, რასაც ტერიტორიის დიდი ნაწილის განადგურება და ათიათასობით ადამიანის დაღუპვა მოჰყვა. ღაზის ჯანდაცვის სამინისტროს მონაცემებით, დაღუპულთა რაოდენობამ 74 600-ს გადააჭარბა. აღნიშნულ მონაცემებს გაერო ეყრდნობა, ხოლო მათი სანდოობა დამოუკიდებელი ორგანიზაციების ანგარიშებითაც არის გამყარებული.

ღაზის ჯანდაცვის სამინისტროს ინფორმაციით, 2025 წლის ოქტომბერში ცეცხლის შეწყვეტის გამოცხადების შემდეგ ისრაელის დარტყმებს დაახლოებით 1 600 ადამიანი ემსხვერპლა. ამავე პერიოდში ისრაელის არმიამ შვიდი სამხედრო დაკარგა.