2026 წლის პირველი 6 თვის განმავლობაში რეგისტრირებული დანაშაულის 72.86% გაიხსნა, რაც გასული წლის ანალოგიურ პერიოდთან შედარებით 6.7%-იანი ზრდაა - შინაგან საქმეთა სამინისტრომ სტატისტიკა შეაჯამა

შინაგან საქმეთა სამინისტრო 2026 წლის პირველი 6 თვის განმავლობაში რეგისტრირებული დანაშაულის სტატისტიკას აჯამებს. უწყების ცნობით, რეგისტრირებული დანაშაულის 72.86% გაიხსნა, რაც გასული წლის ანალოგიურ პერიოდთან შედარებით 6.7%-იანი ზრდაა.

წელს, პირველ 6 თვეში ნარკოტიკული დანაშაულისთვის სისხლის სამართლებრივი დევნა 4 995 ადამიანის მიმართ დაიწყო, რომელთაგან ნარკორეალიზაციაში სხვადასხვა ფორმით ჩართული იყო 963 ადამიანი. მიმდინარე წლის პირველ 6 თვეში მიგრაციის დეპარტამენტის თანამშრომლებმა საქართველოდან უცხო ქვეყნის 2 036 მოქალაქე გააძევეს.

ეს მონაცემი 4-ჯერ აღემატება გასული წლის ანალოგიური პერიოდის მაჩვენებელს. შსს ს ცნობით, 2026 წლის პირველ ნახევარში, გასული წლის ანალოგიურ პერიოდთან შედარებით 27%-ით შემცირდა ყაჩაღობის, 9%-ით ქურდობის, 28%-ით კი ბინიდან ქურდობის ფაქტები. წელს, პირველ 6 თვეში, გაიცა 19 515 მართვის მოწმობა, რაც შარშანდელ მონაცემთან შედარებით 45.5%-იანი ზრდაა.