„40%-იანი დივერსიფიკაცია გვაქვს ღვინის ბაზრების, სახელმწიფო ათეულ მილიონობით ლარს ხარჯავს, რომ ქართული ღვინის პოპულარიზაცია მოხდეს ევროპის, ამერიკის, ჩინეთის ბაზარზე“ - ირაკლი ქადაგიშვილი კითხვაზე, დგამს თუ არა სახელმწიფო ტრადიციული ბაზრის დივერსიფიცირებისთვის ნაბიჯებს

მე ძალიან მოხარული ვარ, რომ დღევანდელი გადაცემა აშკარად არ ემსახურება წარმატებული რთველის აქციას, ეს არის კრიტიკული აზრის გადაცემა და ამისთვის მადლობას ვუხდი ტელეკომპანია „იმედს“, - განაცხადა გადაცემაში „ღია ეთერი“ თელავიდან ჩართვისას მევენახე აკაკი კეკენაძემ.

მისივე თქმით, მევენახეების პროტესტზე ხელისუფლების შემხვედრი, პოზიტიური ნაბიჯი დასაფასებელია, თუმცა ეს დარგში არსებულ დიდ პრობლემებს ვერ გადაფარავს.

„ჩვენ დღეს დარგში საკმაოდ დიდი პრობლემები გვაქვს და ძირითადი პრობლემა არის ფასები.

ბატონებო, როცა თავის დროზე დარგს ასუბსიდირებდით, დარგში ფულს დებდით, ბაზარი არ გქონდათ ნაკვლევი? ახალ ბაზრებზე არ მუშაობდით? ტრადიციული ბაზრის დივერსიფიცირებისთვის ნაბიჯები არ გადაგიდგამთ?“, - მიმართა კითხვით მევენახემ გადაცემის სტუმრებს.

მევენახის კითხვაზე პასუხად დეპუტატმა ირაკლი ქადაგიშვილმა განმარტა, რომ სოფლის მეურნეობის პროგრამები არ შეწყვეტილა და მოხდა მათი კონსოლიდაცია.

„რაც შეეხება საფერავის ფასს, მართალი ბრძანდებით თქვენ, იყო პერიოდი, როცა ბაზარზე იყო შიმშილი და ამან გამოიწვია ბიზნესის დაინტერესება ამ ფასად პროდუქციის მიღებისა. დღეს ბაზარიც გაჯერებულია და აქედან გამომდინარე ფასიც დავიდა იმ დონეზე, რა დონეზეც ბაზარი ითხოვს. მარკერად ავიღოთ ხოლმე, კერძო სუბიექტების ურთიერთობა. მაგალითად, დღეს რომელიღაც ღვინის კომპანია რა ფასად იბარებს ყურძენს. აქ ჩვენ ვხედავთ, სადაც შაქრიანობა და სხვა მოცემულობა არის ნორმალური, ფასი 1.50 ლარს სცდება.

ჩვენი ღვინის ბაზარი დამოკიდებულია მსოფლიო ბაზარზე, 40%-იანი დივერსიფიკაცია გვაქვს ღვინის ბაზრების, სახელმწიფო ათეულ მილიონობით ლარს ხარჯავს, რომ ქართული ღვინის პოპულარიზაცია მოხდეს, არა მხოლოდ ტრადიციულ, არამედ ევროპის, ამერიკის, ჩინეთის ბაზარზე“, - განაცხადა ირაკლი ქადაგიშვილმა.