ლეილა კოლომიკოვი: ქართველმა ხალხმა უკანასკნელ გზაზე ამაყად გააცილა საქართველოს სიყვარულში დამაშვრალი თავისი პატრიარქი

ყველამ ჩვენი წილი პატრიარქი დავკარგეთ, - განაცხადა საკრებულოს დღევანდელ სხდომაზე დედაქალაქის წარმომადგენლობითი ორგანოს წევრმა ლეილა კოლომიკოვმა და პატრიარქის გარდაცვალება სრულიად საქართველოს მიუსამძიმრა.

საკრებულოს წევრის თქმით, მისთვის და მთელი საზოგადოებისთვის საოცრად ამაღელვებელი სანახავი იყო იმ დღეების საქართველო, როდესაც ოკეანედ ქცეულმა ქართველმა ხალხმა უკანასკნელ გზაზე ამაყად გააცილა საქართველოს სიყვარულში დამაშვრალი თავისი პატრიარქი.

„მინდა მადლობა გადავუხადო პარტია „ქართული ოცნების“ გუნდს და ჩვენს ერისკაცს, ბატონ ბიძინა ივანიშვილს, იმ მშვიდობისთვის, რომელიც ჩვენს ქვეყანაში არის და რომელიც გარკვეული ჯგუფისთვის ჯერ კიდევ საქილიკოა.

დღევანდელ უწესრიგო მსოფლიოში კარგად დავინახეთ, რომ ადამიანების სიცოცხლე და გარდაცვალება მხოლოდ სტატისტიკაა. ნამდვილად ბეწვის ხიდზე გაიარა ჩვენმა ქვეყანამ სულ ახლო წარსულში, უკრაინაში ომის დაწყებისთანავე, და ეს საფრთხე ჯერაც არ გამქრალა და რომ არა პარტიის „ქართული ოცნების“ გონივრული პოლიტიკა, დღეს ჩვენ აქ ვერ ვისაუბრებდით ვერც განათლებაზე და ვერც ეკონომიკაზე და დღის წესრიგში მხოლოდ ერთი - ფიზიკური გადარჩენის საკითხი - გვექნებოდა. ასე რომ, კიდევ ერთხელ მადლობა ჩვენს გუნდს მშვიდობისა და სტაბილურობისთვის“, - განაცხადა ლეილა კოლომიკოვმა.