გიორგი ვოლსკი: არის ინტერესი სახელმწიფოების, აშშ-ის, ევროკავშირის ინტერესიც არის იმაში, რომ საქართველოს „შუა დერეფნის“ სივრცე იყოს სტაბილური. საქართველოს გარეშე ეს პროექტები არ ხორციელდება

არის ინტერესი სახელმწიფოების, აშშ-ის, ევროკავშირის ინტერესიც არის იმაში, რომ საქართველოს „შუა დერეფნის“ სივრცე იყოს სტაბილური. საქართველოს გარეშე ეს პროექტები არ ხორციელდება, - განაცხადა საქართველოს პარლამენტის პირველმა ვიცე-სპიკერმა გიორგი ვოლსკიმ.

მისი თქმით, მნიშვნელოვანია, რომ „შუა დერეფნის“ არეალი გახდეს მშვიდობის მაგალითი მთელი მსოფლიოსთვის.

„ატლანტიკურ საბჭოს მოვუსმინოთ, მსოფლიო ბანკს მოვუსმინოთ. მარტო მარტა კოსი და კაია კალასი ხომ არ არიან ვისაც რეალობა უნდა ვკითხოთ?! არის ინტერესი სახელმწიფოების, აშშ-ის, ევროკავშირის ინტერესიც არის იმაში, რომ საქართველოს „შუა დერეფნის“ სივრცე იყოს სტაბილური. საქართველოს გარეშე ეს პროექტები არ ხორციელდება. ეს არეალი უნდა გახდეს მშვიდობის მაგალითი მთელი მსოფლიოსთვის და აზიის უშველებელი რესურსები, თავის კასპიის რეგიონის რესურსებით დაუკავშირდეს ევროპულ ბაზრებს. მისასალმებელია. არსებობს გარკვეული სექტა, ვისაც ეს არ უხარია“, - განაცხადა გიორგი ვოლსკიმ.

აშშ-ი და აზერბაიჯანი ერთობლივ პროექტს იწყებენ, რომელიც უფრო ფართო, შუა დერეფნის ნაწილია და საქართველოსაც მოიცავს. ინფორმაციას ევრონიუსი ავრცელებს. სტატიაში ნახსენებია რეგიონში ბოლო ორი ათწლეულის განმავლობაში განხორციელებული მნიშვნელოვანი პროექტები. მათ შორის ბაქო-თბილისი-ჯეიჰანის ნავთობსადენი და სამხრეთის დერეფანი.