რომან კაკულია: ალიევი ისეთ მოთამაშედ ყალიბდება, რომელსაც შორს მიმავალი გეგმები აქვს, მისთვის გასაგები ხდება, რომ ტენდენციები, რომლის ნაწილიც უნდა რომ იყოს, არ უნდა იყოს აცდენილი ტენდენციებისგან, რომლის ნაწილიც საქართველო აღმოჩნდება

რაც მიმდინარეობს ჩრდილოეთით და სამხრეთით, ამან გაზარდა ჩვენი რეგიონის მნიშვნელობა. აზერბაიჯანი-სომხეთის ურთიერთობა და ტრამპის ჩართულობა - ესეც გასაგებია. ბატონი ალიევი ამ ბოლო წლებში, მას შემდეგ, რაც მან მოაგვარა ის მთავარი პრობლემა, ისეთ მოთამაშედ ყალიბდება, რომელსაც შორს მიმავალი გეგმები აქვს და მისთვის გასაგები ხდება, რომ ის ტენდენციები, რომლის ნაწილიც მას უნდა რომ იყოს, არ უნდა იყოს აცდენილი იმ ტენდენციებისგან, რომლის ნაწილიც საქართველო აღმოჩნდება სამომავლოდ, - განაცხადა გადაცემაში „დღის ქრონიკა“ საზოგადოებრივი მოძრაობა „პოლიტიკური არჩევანის“ დამფუძნებელმა, რომან კაკულიამ.

მისივე თქმით, ეჭვქვეშ დასაყენებელი არ არის ის, რაც გაჟღერდა საქართველოს და აზერბაიჯანს შორის თანამშრომლობის პერსპექტივებიდან.

„ჩვენთვის მთავარია, დავინახოთ პროგნოზი, რომელ მსოფლიოს ველოდებით. ჩვენ ვართ მოლოდინში, რომ ამერიკა კვლავ აღიდგენს თავის დომინანტობას, თუ ველოდებით, რომ ამერიკა აღიარებს სხვადასხვა ძალთა ცენტრის არსებობას, ეს ფუნდამენტურად ცვლის ჩვენს დამოკიდებულებებს. აზერბაიჯანი ისეთ ტენდენციაშია მოხვედრილი, მისი ზურგი საკმაოდ მყარი მხარდაჭერით არის გამყარებული და მას უფრო მეტის უფლება შეუძლია მისცეს საკუთარ თავს. ჩვენი გამოწვევები უფრო დიდია და ჩვენი დაცულობის ხარისხი შედარებით ნაკლებია ჩრდილოელი მეზობლიდან გამომდინარე. სწორედ მანდ გაირკვევა ყველაფერი“, - აღნიშნა რომან კაკულიამ.