რუსთავის სანერგე მეურნეობაში გამოყვანილი ნერგებით ქალაქის რამდენიმე უბანი გამწვანდება

რუსთავში გამწვანების მასშტაბური აქციები მოეწყობა, ამისთვის ქალაქს ხე-მცენარეების საკუთარი რესურსი აქვს, რომელიც ,,რუსთავსერვის ცენტრის” სანერგე მეურნეობაშია დაკალმებული და გაზრდილი. რუსთავის სანერგე მეურნეობა, ქალაქის გარეუბანში, ბუნებრივ ჭალაში 2 ჰექტარზეა გაშენებული და აბსოლუტურად მწვანე ლანდშაფტს ქმნის. სანერგეში 64 სხვადასხვა სახეობის, 7000 ათასამდე ხე-მცენარეა.

„ეკოლოგია რუსთავის ისტორიული პრობლემაა, ამ გამოწვევის დასაძლევად, აქტიურად ვმუშაობთ სამინისტროსთან და პარლამენტთან ერთად, მაგრამ კანონის გამკაცრების და ემისიების შემცირების პარალელურად, ქალაქის ენდემური ფლორის აღდგენა-გამდიდრებაა საჭირო. ახალი მწვანე სივრცეების შექმნა, ეკოსისტემის გაუმჯობესების უმთავრესი და უტყუარი გზაა. დღეს გვაქვს შესაძლებლობა, რომ რუსთავის ეკოსისტემა უკეთესობისკენ შევცვალოთ და ეს შესაძლებლობა, აუცილებლად უნდა გამოვიყენოთ. მიმდინარე წლის გაზაფხულზე, ქალაქში გამწვანების მასშტაბურ აქციებს ვგეგმავთ. ჭალის ტყის განაშენიანება უკვე დაწყებული გვაქვს. ჩვენს სანერგე მეურნეობაში გამოყვანილი მცენარეებით კი ძალიან მალე, რუსთავის რამდენიმე უბანში გავაჩენთ ახალ მწვანე სივრცეს”, - განაცხადა რუსთავის მერმა ნინო ლაცაბიძემ.

მხოლოდ მიმდინარე წელს, რუსთავის სანერგე მეურნეობაში 4000 ხე-მცენარე დაკალმდა, ტერიტორიაზე მოწყობილია სასათბურე მეურნეობაც, სადაც პროფესიონალი ფლორისტები არიან დასაქმებულნი. აქვე ინახება ჭალის ტყეების განაშენიანების პროექტისთვის შეძენილი ნერგებიც. ჭალის ტყეების განაშენიანების პროექტი, რომელიც 320 ჰექტარ ფართობზე, ბუნებრივი ტყის აღდგენას ითვალისწინებს, უკვე დაწყებულია. პარალელურად, რუსთავის მერიას ქალაქის გამწვანების საერთო სტრატეგიაც აქვს შემუშავებული და დარგვის სეზონის დასრულებამდე, ქალაქის სანერგე მეურნეობაში გამოყვანილი ნერგებით, რუსთავის რამდენიმე უბანი გამწვანდება.