აბას არაღჩიმ განაცხადა, რომ თეირანსა და ვაშინგტონს შორის არსებული კონფლიქტის მოგვარების ერთადერთი გზა დიპლომატიაა

ირანის საგარეო საქმეთა მინისტრმა, აბას არაღჩიმ განაცხადა, რომ თეირანსა და ვაშინგტონს შორის არსებული კონფლიქტის მოგვარების ერთადერთი გზა დიპლომატიაა.

„ჩვენი პირობები მკაფიოა და ჰორმუზის სრუტის გახსნისკენ გადადგმული ნებისმიერი ნაბიჯი სწორედ ამ პირობების დაკმაყოფილებაზეა დამოკიდებული. შეიქმნა ჩიხური სიტუაცია, რომლიდან გამოსვლაც მხოლოდ მოლაპარაკებების გზით მიღწეული შეთანხმებით არის შესაძლებელი“, - დაწერა არაღჩიმ სოციალურ ქსელში.

როგორც ცნობილია, მიმდინარე კვირის დასაწყისში, გაეროს გენერალურ ასამბლეაზე, ირანის მხარემ განაცხადა, რომ კატარელი შუამავლების მეშვეობით შეერთებულ შტატებს სამშვიდობო ინიციატივა გადასცა, რომელიც ჰორმუზის სრუტის გახსნასა და საბრძოლო მოქმედებების შეწყვეტას ითვალისწინებდა.

თუმცა, შაბათს დონალდ ტრამპმა განაცხადა, რომ აღნიშნული გეგმა უარყო. აშშ-ის პრეზიდენტის თქმით, ირანელები სტრატეგიულად მნიშვნელოვანი საზღვაო გზის გახსნის შესახებ შეთანხმების მიღწევას სასოწარკვეთის გამო ცდილობენ.

„მათ სურთ შეთანხმების დადება ჰორმუზის სრუტის დაუყოვნებლივ გახსნაზე, რადგან უმძიმეს მარცხს განიცდიან“, - განუცხადა ტრამპმა ჟურნალისტებს.

თავის მხრივ, არაღჩიმ აღნიშნა, რომ ტრამპის საჯარო განცხადებების მიუხედავად, შუამავლებს ვაშინგტონის ოფიციალური უარი ირანული მხარისთვის ჯერ არ გადაუციათ.

„ჩვენ ველოდებით, როდის გადმოგვცემენ შუამავლები საბოლოო პოზიციას და გადაწყვეტილებას ამის მიხედვით მივიღებთ“, - განაცხადა ირანის საგარეო საქმეთა მინისტრმა.