აკაკი ალადაშვილი „ნაციონალურ მოძრაობაზე“: არ ესმით, რომ როდესაც მოინდომეს ქართული ტრადიციების, ოჯახური ღირებულებების შეცვლა, ისინი დაუპირისპირდნენ ისტორიას, ღირებულებებს, რომელიც ამდენი საუკუნის განმავლობაში შევინახეთ

საპროცედურო საკითხთა და წესების საპარლამენტო კომიტეტის თავმჯდომარის პირველი მოადგილე აკაკი ალადაშვილი IRI-ის კვლევის შედეგებს „დღის ქრონიკაში“ გამოეხმაურა.

როგორც მან აღნიშნა, ოპოზიციის არჩეულმა სტრატეგიამ ისინი მხარდამჭერების შემცირებამდე მიიყვანა.

„9 წელი იყვნენ ხელისუფლებაში და ვერ გაიგეს რა მოსწონს ქართველ ხალხს, რა შეურაცხყოფს, რა უხარია და რა არ უხარია. მათ არ ესმით, რომ როდესაც მოინდომეს ქართველი ადამიანის, ქართული ტრადიციების, ოჯახური ღირებულებების შეცვლა, ისინი დაუპირისპირდნენ ისტორიას, ღირებულებებს, რომელიც ამდენი საუკუნის განმავლობაში მოვიტანეთ და შევინახეთ.

ეს ადამიანები ვერაფერს ისწავლიან, რადგან ეს მათი ბუნებაა, მათ ქართული იდენტობა არ აქვთ.

მათ ასევე ჰყავთ გარე დამკვეთები, რომლებიც ყოველ ჯერზე დავალებებს აძლევენ. საზოგადოება ამასაც კარგად ხედავს. მათ არ აქვთ უფლება, შეცვალონ მიღებული ბრძანება, რადგან ვასალები არიან“, - აღნიშნა ალადაშვილმა.

IRI-ის გამოკითხვით, „ნაციონალურ მოძრაობას“ 5 პროცენტი აქვს, „ქართულ ოცნებას“- 36. საერთო ჯამში კი, 8 ოპოზიციურ პარტიას მხოლოდ 16 პროცენტიანი მხარდაჭერა აქვს.