ალექსანდრე კარტოზია: გერმანიის პრეზიდენტთან კარგი საუბარი შედგა. ისეთი შთაბეჭდილებაა და სურვილი, რაც მთავარია, რომ გერმანიასა და საქართველოს შორის ურთიერთობები გაუმჯობესდეს, კიდევ უფრო განმტკიცდეს, გახდეს ისეთი, როგორიც ეკადრება ჩვენს ისტორიულ ურთიერთობას

გერმანიაში საქართველოს ელჩმა ალექსანდრე კარტოზიამ გერმანიის პრეზიდენტს, ფრანკ-ვალტერ შტაინმაიერს რწმუნებათა სიგელები დღეს გადასცა, შესაბამისად, კარტოზია 9-თვიანი ლოდინის შემდეგ დიპლომატიურ საქმიანობას დღეიდან შეუდგება.

როგორც კარტოზიამ „ქრონიკასთან“ განაცხადა, გერმანიის პრეზიდენტთან კარგი საუბარი ჰქონდა.

„დღეს შედგა სიგელების გადაცემა. ლოდინმა დიდხანს გასტანა, თითქმის 9 თვე გავიდა. ჯერ კიდევ გასული წლის დეკემბერში გადავეცი პროტოკოლის ხელმძღვანელს იმ სიგელების ასლები, რომლებიც დღეს პრეზიდენტს გადავეცი. ვესაუბრე პრეზიდენტს. არაერთხელ შევხვედრივარ და რამდენჯერმე იყო კიდეც საქართველოში. ვუთხარი, რომ 9 თვე ლოდინი შეიძლება ღირდა კიდეც იმად, რომ გერმანიის პრეზიდენტის ამ ახალ ადგილსამყოფელში პირველი ელჩი ვყოფილიყავი, რომლის აკრედიტაციაც მოხდა. მოგეხსენებათ, გერმანიის პრეზიდენტი გადავიდა სხვა სასახლეში, ვილა ბორსიკში და იქ გაიმართა დღეს სიგელების გადაცემა, ანუ ელჩების აკრედიტაცია. კარგი საუბარი იყო და ისეთი შთაბეჭდილებაა და სურვილი, რაც მთავარია, რომ გერმანიასა და საქართველოს შორის ურთიერთობები გაუმჯობესდეს, კიდევ უფრო განმტკიცდეს, გახდეს ისეთი, როგორიც ეკადრება ჩვენს ისტორიულ ურთიერთობას. ყველასთვის ცნობილია, რომ ევროპაში ყველაზე უფრო მეგობრული საქართველოსადმი და ასევე გერმანიისათვის ყველაზე მეგობრული ქვეყანა კავკასიასა და აღმოსავლეთში საქართველო იყო და ეს არის ჩვენი ურთიერთობის ისტორია. სურვილი ნამდვილად არის, რომ აღორძინდეს და გამოცოცხლდეს ურთიერთობები. იმედი მაქვს, ეს ასეც მოხდება“, - აღნიშნა კარტოზიამ.