ამაღლების დღესასწაულთან დაკავშირებით, პატრიარქმა თბილისში, საბურთალოს ამაღლების სახელობის ტაძარში წირვა აღავლინა

განსაკუთრებით ამაღლების მოვლენის შემდეგ მოციქულებს განუმტკიცდათ რწმენა იმისა, რომ იესო ქრისტე არის ნამდვილად ძე ღვთისა, გამოჩნდა, რომ მასში ორი ბუნებაა - საღმრთო და კაცობრივი, - განაცხადა სადღესასწაულო მსახურების შემდეგ ქადაგებისას უწმინდესმა და უნეტარესმა, სრულიად საქართველოს კათოლიკოს-პატრიარქმა, მცხეთა-თბილისის მთავარეპისკოპოსმა, ბიჭვინთისა და ცხუმ-აფხაზეთის მიტროპოლიტმა შიო III-მ.

ამაღლების დღესასწაულთან დაკავშირებით, სრულიად საქართველოს კათოლიკოს-პატრიარქმა წირვა თბილისში, საბურთალოს ამაღლების სახელობის ტაძარში აღავლინა.

„დღეს ჩვენ აღვნიშნავთ მოვლენას, როდესაც უფალი იესო ქრისტე უკანასკნელად ესაუბრება თავის მოციქულებს. ეცხადება უკანასკნელად და უბრძანებს მათ, რომ იერუსალიმში დაელოდონ სულიწმინდის გარდამოსვლას. შემდეგ მიჰყავს ისინი ელეონის მთაზე, აკურთხებს მათ და მათ თვალწინ იწყებს ზეცად ამაღლებას.

განსაკუთრებით ამაღლების ამ მოვლენის შემდეგ მათ განუმტკიცდათ, გაუმყარდათ რწმენა იმისა, რომ იესო ქრისტე არის ნამდვილად ძე ღვთისა და გამოჩნდა, რომ მასში ორი ბუნებაა - საღმრთო და კაცობრივი“, - აღნიშნა პატრიარქმა შიო მესამემ.

მართლმადიდებელი ეკლესია დღეს მაცხოვრის ამაღლებას ზეიმობს, რომელიც 12 საუფლო დღესასწაულიდან ერთ-ერთია და აღდგომიდან მე-40 დღეს აღინიშნება. სახარების მიხედვით, ქრისტე ზეცად ელეონის მთაზე ამაღლდა.