AP: აშშ-ში დიზელის ფასმა რეკორდულ მაჩვენებელს მიაღწია. ერთი გალონის ღირებულებამ 6 დოლარს გადააჭარბა

აშშ-ში დიზელის საწვავის ფასმა პარასკევს ახალი რეკორდი დაამყარა და საშუალოდ გალონზე 6 დოლარს გადააჭარბა. ინფორმაციას Associated Press-ი ავრცელებს.

სააგენტოს ცნობით, ამის მიზეზი ირანთან აშშ-ის ომია, რომელიც მსოფლიოში საწვავის მიწოდების ჯაჭვებზე ახდენს გავლენას.

საავტომობილო კლუბ AAA-ის მონაცემებით, დიზელის საშუალო ეროვნული ფასი გალონზე 6,05 დოლარს შეადგენს. გასულ კვირას ეს მაჩვენებელი 5,85 დოლარი იყო, ხოლო გასული წლის ამავე პერიოდში - 3,70 დოლარი.

Associated Press-ის ინფორმაციით, დიზელის გაძვირება ყოველდღიური მოხმარების უამრავი პროდუქტის ტრანსპორტირებას აძვირებს, რადგან სატვირთო და მიწოდების ქსელების დიდი ნაწილი დიზელზე მუშაობს. ზოგიერთმა კომპანიამ უკვე გადაიტანა გაზრდილი ხარჯები მომხმარებლებზე და ონლაინ-შეკვეთებსა და საფოსტო გზავნილებზე დამატებითი გადასახადები დააწესა.

მომხმარებლებმა შესაძლოა ფასების ზრდა სულ უფრო მეტად იგრძნონ, განსაკუთრებით, სურსათის შეძენისას. მალფუჭებადი პროდუქტები, მათ შორის ხორცი და ბოსტნეული, დიზელის გაძვირებით გამოწვეულ ერთ-ერთ ყველაზე მყისიერ წნეხს განიცდის, რადგან მათი ტრანსპორტირება და მარაგების ხშირი შევსებაა საჭირო. ამასთან, ზოგიერთი სასოფლო-სამეურნეო პროდუქტის მოსავალს სწორედ დიზელზე მომუშავე ტექნიკით იღებენ.