არჩილ გორდულაძე: ევროპული ბიუროკრატია იქამდე მივიდა, რომ თურმე გმირობაა სამართალდამცავი ორგანოსთვის „მოლოტოვის კოქტეილის“ სროლა და ამ ყველაფერში ღიად, საჯაროდ ფულის გადახდა, შემდეგ სახელმწიფოსთვის დაბრალება, რომ ამაზე პასუხის მოთხოვნა თურმე არის დემოკრატიული უკუსვლა

სამწუხაროდ, ვხედავთ, რომ არარჩეული ბიუროკრატიის მიმართება საქართველოსადმი არ იცვლება. ისევ და ისევ ტყუილი და ისევ და ისევ გაშავების მცდელობა, - ასე შეაფასა არჩილ გორდულაძემ გაეროს ადამიანის უფლებათა საბჭოს სხდომაზე საქართველოში ადამიანის უფლებების მდგომარეობაზე გაკეთებული განცხადებები.

როგორც იურიდიულ საკითხთა საპარლამენტო კომიტეტის თავმჯდომარემ „დღის ქრონიკაში“ აღნიშნა, ამ ყველაფრის მიზანია, ქართველი ხალხის არჩევანზე ზეწოლა.

„არსებობს ბიუროკრატია და ამ ბიუროკრატიის წარმომადგენლები ევროკავშირის მხრიდან, რომელთა მიზანიც ბოლო წლების განმავლობაში არ შეცვლილა, რაც განსაკუთრებით გამოიკვეთა 2022 წლის თებერვალში. უკრაინაში დაწყებული მოვლენების შემდეგ, განსაკუთრებულად გამძაფრებულები და აგრესიულები არიან არა მხოლოდ ჩვენი გუნდის მიმართ, არამედ არჩევნის გამკეთებელი ხალხის მიმართ.

ევროპული ბიუროკრატია იქამდე მივიდა, რომ თურმე გმირობა არის სამართალდამცავ ორგანოს ესროლო „მოლოტოვის კოქტეილი“, სცადო ცოცხლად დაწვა და ამ ყველაფერში ღიად, საჯაროდ ფული გადაიხადო. შემდეგ კი სახელმწიფოს დააბრალო, რომ ამაზე პასუხის მოთხოვნა თურმე არის დემოკრატიული უკუსვლა“, - აღნიშნა გორდულაძემ.

გაეროს ადამიანის უფლებათა საბჭოს 63-ე სესიის მესამე სხდომაზე საქართველოსთან დაკავშირებულ ადამიანის უფლებების მდგომარეობაზეც გაამახვილეს ყურადღება. მოთხოვნები უცვლელია. მათ შორის არის კანონების გაუქმება. სხდომის შემდეგ გამოქვეყნებულ განცხადებაში ნათქვამია ისიც, რომ ევროკავშირი ოპოზიციონერი ლიდერების დაკავებას გმობს.