არჩილ გორდულაძე: საგარეო საქმეთა სამინისტრო აგრძელებს მუშაობას, რომ ერთი მხრივ არ აღიარების პოლიტიკა იყოს უზრუნველყოფილი, ხოლო მეორე მხრივ შემცირდეს იმ ქვეყანათა რაოდენობა, რომლებიც ჩვენს ტერიტორიებს აღიარებს სახელმწიფოდ

პარლამენტის იურიდიულ საკითხთა კომიტეტის თავმჯდომარე არჩილ გორდულაძე ნაურუს სახელმწიფოს გადაწყვეტილებას გამოეხმაურა, რომელმაც ოკუპირებული აფხაზეთისა და ცხინვალის რეგიონის აღიარების გადაწყვეტილება ოფიციალურად გააუქმა.

მისი თქმით, საგარეო საქმეთა სამინისტრო ისევ და ისევ აგრძელებს მუშობას, რომ არაღიარების პოლიტიკა იყოს უზრუნველყოფილი.

„საგარეო საქმეთა მინისტრისა და სამინისტროს თანამშრომლების უშუალო საქმიანობის შედეგია, რომ ჩვენი დროებით ოკუპირებული ტერიტორიების სახელმწიფოდ აღიარება მხოლოდ და მხოლოდ რამდენიმე ქვეყანას აქვს დარჩენილი. რა თქმა უნდა, საგარეო საქმეთა სამინისტრო ისევ და ისევ აგრძელებს, რომ ერთი მხრივ, არ აღიარების პოლიტიკა იყოს უზრუნველყოფილი, ხოლო მეორე მხრივ შემცირდეს იმ ქვეყანათა რაოდენობა, რომლებიც ჩვენს ოკუპირებულ ტერიტორიებს სახელმწიფოდ აღიარებს", - აღნიშნა გორდულაძემ.