ავთანდილ კასრაძე: ქუთაისის ტექნოლოგიური ჰაბითა და საერთაშორისო აქსელერატორების მონაწილეობით ვავითარებთ გარემოს, რომელიც ცოდნას, თანამედროვე ინფრასტრუქტურასა და საერთაშორისო ბაზრებზე გასვლის შესაძლებლობებს აერთიანებს

ჩვენი მიზანია საქართველო ჩამოყალიბდეს რეგიონში ინოვაციის ცენტრად, რომელიც ხელს უწყობს მაღალი ღირებულების ტექნოლოგიური პროდუქტების შექმნას და საერთაშორისო ინვესტიციების მოზიდვას, რისთვისაც აუცილებელია საერთაშორისო პარტნიორობა და გლობალურ ბაზრებზე წვდომა, - განაცხადა საქართველოს ეკონომიკისა და მდგრადი განვითარების სამინისტროს ინოვაციების და ტექნოლოგიების სააგენტოს თავმჯდომარე ავთანდილ კასრაძემ ნიუ-იორკში გამართულ საერთაშორისო კონფერენციაზე Outbound Summit 2026.

World Talents-ის ორგანიზებულ თემატურ დისკუსიაზე - „ოქროს ვიზის მიღმა: კაპიტალიდან ეკონომიკურ წვლილამდე“, GITA-ს თავმჯდომარემ დამსწრე საზოგადოებას საქართველოს გამოცდილება გაუზიარა. მან განსაკუთრებული ყურადღება გაამახვილა ქუთაისის ტექნოლოგიურ ჰაბზე, საერთაშორისო ტალანტების მოზიდვასა და ქვეყანაში ოთხი გლობალური აქსელერატორის - Plug and Play-ს, Startupbootcamp-ის, 500 Global-ისა და Founder Institute-ის საქმიანობაზე.

„ქუთაისის ტექნოლოგიური ჰაბითა და ოთხი საერთაშორისო აქსელერატორის მონაწილეობით, ვავითარებთ გარემოს, რომელიც აერთიანებს ცოდნას, თანამედროვე ინფრასტრუქტურასა და საერთაშორისო ბაზრებზე გასვლის შესაძლებლობებს,“ - აღნიშნა ავთანდილ კასრაძემ.

სიტყვით გამოსვლისას სააგენტოს ხელმძღვანელმა ასევე ისლაპარაკა მთავრობის როლზე საერთაშორისო კავშირების დამყარებაში, საინვესტიციო ფონდებისა თუ აქსელერატორების მხარდაჭერაში და ხაზი გაუსვა სტარტაპების დამფუძნებლების პასუხისმგებლობას - არსებული შესაძლებლობები რეალურ ბიზნესშედეგებად აქციონ. დისკუსიისას განსაკუთრებული ინტერესი გამოიწვია ინოვაციური სტარტაპებისა და მცირე და საშუალო ბიზნესის მხარდაჭერის მხრივ საქართველოს მთავრობის მიერ გატარებულმა რეფორმებმა.

ინფორმაციას ეკონომიკისა და მდგრადი განვითარების სამინისტროს ინოვაციების და ტექნოლოგიების სააგენტო ავრცელებს.