ბაკურიანში საჯარო სკოლის მშენებლობა აქტიურად მიმდინარეობს, ახალი საბავშვო ბაღი კი დასრულების ეტაპზეა

ინფრასტრუქტურის სამინისტროს ინფორმაციით, ბორჯომის მუნიციპალიტეტის დაბა ბაკურიანში 400 მოსწავლეზე გათვლილი საჯარო სკოლის მშენებლობა აქტიურად მიმდინარეობს, ხოლო 150 ბავშვზე გათვლილი საბავშვო ბაღის პროექტი დასკვნით ეტაპზეა.

ახალი სკოლა შენდება ყოფილი საჯარო სკოლის ტერიტორიაზე და თანამედროვე სტანდარტების შესაბამისად მოიცავს საკლასო ოთახებს, ლაბორატორიას, სპორტულ და კვების სივრცეებს. პროექტის ფარგლებში ასევე გათვალისწინებულია სპორტული მოედნის მოწყობა და მოსწავლეების საჭიროებებზე მორგებული ინფრასტრუქტურის განვითარება.

საბავშვო ბაღში, სასწავლო ოთახებთან ერთად, განთავსებულია საძინებლები, ადმინისტრაციული, სამედიცინო და სამზარეულოს ბლოკი. მოწყობილია, ასევე, შიდა და გარე სათამაშო სივრცეები და რეკრეაციული ზონა.

პროექტების განხორციელების შედეგად ბაკურიანს შეემატება თანამედროვე საგანმანათლებლო სივრცეები, რაც მნიშვნელოვნად გააუმჯობესებს როგორც ზოგად, ისე სკოლამდელ განათლებაზე ხელმისაწვდომობას.