ბასა ფოცხიშვილი 26 მაისის ღონისძიებაზე: წელს განსაკუთრებული ფიცის დადება გვექნება, ვინაიდან ქრისტიანობის სახელმწიფოებრივ რელიგიად გამოცხადების 1700 წლისთავს ეძღვნება მთელი საზეიმო ღონისძიება, რაც შეეხება ჰიმნს, მსოფლიო ოპერის ვარსკვლავები - ნინო მაჩაიძე, ქეთევან ქემოკლიძე და იანო ალიბეგაშვილი შეასრულებენ

წელს განსაკუთრებული ფიცის დადება გვექნება, ვინაიდან ქართლის მოქცევის, ქრისტიანობის სახელმწიფოებრივ რელიგიად გამოცხადების 1700 წლისთავს ეძღვნება მთელი საზეიმო ღონისძიება, - განაცხადა 26 მაისის საზეიმო ღონისძიების შესახებ რეჟისორმა ბასა ფოცხიშვილმა.

მან დაგეგმილი ღონისძიების დეტალებზეც ისაუბრა.

„გადავწყვიტეთ, რომ 12 რეგიონში დადებულიყო ფიცი - ჩვენი ჯარისკაცებისთვის ეს იქნება ძალიან დასამახსოვრებელი და მნიშვნელოვანი დღე იმიტომ, რომ წმინდა ადგილებში და ასეთ მნიშვნელოვან წელს დადეს ფიცი და გახდნენ საქართველოს ჯარისკაცები.

რაც შეეხება ჰიმნს, მსოფლიო ოპერის ვარსკვლავები - ნინო მაჩაიძე, ქეთევან ქემოკლიძე და იანო ალიბეგაშვილი შეასრულებენ ოპერისა და ბალეტის სახელმწიფო თეატრის კაპელასთან ერთად," - განაცხადა ბასა ფოცხიშვილმა.

წელს სამხედრო ფიცს 600-მდე წვევამდელი დადებს. საქართველოს დამოუკიდებლობის დღის აღსანიშნავი მთავარი ღონისძიებისთვის მზადება უკვე მიმდინარეობს. ამასთან, მთელი ქვეყნის მასშტაბით, ოც ქალაქში შესაძლებელი იქნება სამხედრო ტექნიკის, შეიარაღების და აღჭურვილობის დათვალიერება. ასევე სხვადასხვა ქალაქში სხვადასხვა სამინისტრო იქნება წარმოდგენილი.