ბელგიაში ავტომობილების გამყიდველი დნმ-ტესტის შემდეგ სამეფოს პრინცი გახდა👑

ბელგიაში 26 წლის ავტომობილების გამყიდველი, კლემან ვანდენკერკჰოვი პრინცად ცნეს, მას შემდეგ რაც მისი სამეფო წარმოშობა დნმ-ტესტმა დაადასტურა. CNN-ის ცნობით, კლემანი 2000 წლის აგვისტოში დაიბადა. მისი დედა ბელგიელი მომღერალი ირის ვანდერკერკჰოვია, რომელიც სცენაზე ვენდი ვან ვატენის ფსევდონიმით გამოდის, მამა კი მეფე ფილიპეს უმცროსი ძმა - პრინცი ლორანი. წყვილს 1990-იან წლებში ხანმოკლე რომანი ჰქონდა.

თავისი სამეფო წარმოშობის შესახებ კლემანმა დედისგან 16 წლის ასაკში შეიტყო. ოთხი წლის შემდეგ მან მამა მოინახულა, რომელიც დნმ-ტესტზე დათანხმდა.

მამობის დადასტურების შემდეგ კლემანსა და ლორანს შორის „ღია და პატიოსანი საუბრები“ შედგა. ექვსი თვის შემდეგ, მერიის შენობაში გამართულ მოკრძალებულ ცერემონიაზე, კაცი იურიდიულად ცნეს მეფის უმცროსი ძმის ვაჟად და მემკვიდრედ, თუმცა საჯარედ ეს ინფორმაცია მხოლოდ ახლა გავრცელდა.

ფორმალურმა აღიარებამ ახალ პრინცს მიანიჭა უფლება, ლორანის პირად ქონებაზე ნახევარძმებთან და დებთან თანაბრად პრეტენზია ჰქონდეს. ამავდროულად, მას არ გააჩნია ოფიციალური მოვალეობები და ბელგიის ტახტზე უფლებები.

კლემანმა განაცხადა, რომ ახლა მას შეუძლია მამის გვარი აიღოს, თუმცა დარწმუნებული არ არის, გააკეთებს თუ არა ამას.

„მე ვამაყობ ვანდენკერკჰოვის გვარით. ამ გვარის დათმობა იმ ყველაფრის ღალატი იქნებოდა, რაც დედაჩემმა ჩემთვის გააკეთა“, - განუცხადა პრინცმა ერთ-ერთ ადგილობრივ გაზეთს.