Bloomberg: ევროკომისიამ უკრაინას პორტების დაბომბვით დაზარალებული ფერმერებისთვის 220 მილიონი ევროს დახმარებაზე უარი უთხრა

ევროკომისიამ უარყო უკრაინის მოთხოვნა 220 მილიონი ევროს ოდენობის დახმარების გამოყოფაზე, რომელიც საპორტო ინფრასტრუქტურაზე რუსული დარტყმების შედეგად დაზარალებული ფერმერების მხარდასაჭერად იყო განკუთვნილი. ამის შესახებ უკრაინის აგრარული პოლიტიკისა და სურსათის მინისტრმა, ტარას ვისოცკიმ Bloomberg-თან ინტერვიუში განაცხადა.

ევროკომისიის უარის მიუხედავად, აგრარული სექტორი საჭირო მხარდაჭერას მაინც მიიღებს მსოფლიო ბანკისგან 250 მილიონი დოლარის ოდენობის შეღავათიანი სესხის სახით.

მინისტრის თქმით, ეს დაფინანსება დროებით სტაბილურობას უზრუნველყოფს, თუმცა მან ხაზი გაუსვა გრძელვადიანი გადაწყვეტილებების მოძიების აუცილებლობას.

„ეს მეტ-ნაკლებად მოგვცემს საშუალებას, ახალ წლამდე გავძლოთ. თუმცა, ახლავე უნდა ვიფიქროთ იმაზე, თუ რა იქნება გაზაფხულიდან, რადგან ვითარება კვლავ კრიტიკული რჩება“, - აღნიშნა ვისოცკიმ.

მან დასძინა, რომ აგვისტოში უკრაინამ ევროკავშირს 2027 წლისთვის ბიოეთანოლსა და შაქარზე უბაჟო კვოტების გაზრდა სთხოვა, რადგან კიევი ცდილობს გაზარდოს ევროკავშირისთვის საჭირო პროდუქციის მიწოდება. თუ პროცესი წარმატებით წარიმართება, უკრაინა გეგმავს სხვა აგრარულ პროდუქტებზეც დააყენოს ექსპორტის კვოტების გაფართოების საკითხი.

ვისოცკიმ ასევე განაცხადა, რომ უკრაინა რუსეთთან საზღვაო ცეცხლის შეწყვეტას არ ელის, ვინაიდან მოსკოვმა ზავის შესახებ ყველა წინადადება უარყო.

თავის მხრივ, უკრაინის პრემიერ-მინისტრმა, სერგეი კორეცკიმ განაცხადა, რომ წელს უკრაინა რუსეთთან ომზე სულ მცირე 155 მილიარდ დოლარს დახარჯავს. მან ასევე დასძინა, რომ ქვეყნის თავდაცვის ბიუჯეტის დეფიციტი 27 მილიარდ დოლარს შეადგენს.