ბრიტანეთის პრემიერმა განაცხადა, რომ ქვეყანამ ევროკავშირთან მომავალი ურთიერთობების სხვადასხვა ვარიანტი უნდა განიხილოს, მათ შორის ბლოკში ხელახლა გაწევრიანება

დიდი ბრიტანეთის პრემიერ-მინისტრმა, ენდი ბერნემმა განაცხადა, რომ ქვეყანამ ევროკავშირთან მომავალი ურთიერთობების სხვადასხვა ვარიანტი უნდა განიხილოს, მათ შორის ბლოკში ხელახლა გაწევრიანება. მან კიდევ ერთხელ გაუსვა ხაზი თავის პოზიციას, რომ „ბრექსიტმა“ გაერთიანებულ სამეფოს „სარგებელზე მეტი ზიანი მოუტანა“.

ბერნემის განცხადებებს საფრანგეთის პრეზიდენტის, ემანუელ მაკრონის მხრიდან არაერთგვაროვანი რეაქცია მოჰყვა. მაკრონის თქმით, ბრიტანეთის ევროკავშირში დაბრუნება „ძალიან კარგი სიახლე“ იქნება, თუმცა მან მკვეთრად უარყო იდეა, რომ ურთიერთობების გადატვირთვისას ლონდონს მიეცეს შესაძლებლობა, წევრობის პირობებიდან მხოლოდ მისთვის სასურველი პუნქტები ამოარჩიოს.

სამშაბათს, „ლეიბორისტული პარტიის“ ყოველწლიურ ყრილობაზე სიტყვით გამოსვლისას, ბერნემმა, რომელიც 2016 წლის რეფერენდუმზე ევროკავშირში დარჩენის კამპანიას უჭერდა მხარს, აღნიშნა, რომ ქვეყანამ კვლავ უნდა განიხილოს „ევროპელ პარტნიორებთან ბრიტანეთის გრძელვადიანი ურთიერთობის“ შესაძლებლობები.

მისი თქმით, ევროკავშირიდან გამოსვლამ ვერ შეასრულა მომხრეთა დაპირება „კონტროლის დაბრუნების“ შესახებ და, სანაცვლოდ, ქვეყანა დაასუსტა, განსაკუთრებით ეკონომიკისა და მიგრაციის მაღალი მაჩვენებლების მართვის კუთხით.