ბუკინგემის სასახლეში რესტავრაციის დროს სამეფო კარის პერსონალის მიერ საუკუნის წინ მივიწყებული ნივთები აღმოაჩინეს

ბუკინგემის სასახლეში მუშებმა აღმოაჩინეს ნივთები, რომლებსაც სამეფო კარის თანამშრომლები შენობაში საუკუნეზე მეტი ხნის განმავლობაში ტოვებდნენ. ეს შენობის რესტავრაციის პროცესში მოხდა, რომელიც 2017 წელს დაიწყო.

The Guardian-ის ცნობით, ყველაზე ძველ საგნებს შორისაა 1889 წლის გაზეთ Standard-ის ფრაგმენტი ლონდონის უესტ-ენდის თეატრალური დადგმების აფიშებით. ასევე, რესტავრატორებმა მიაგნეს XIX საუკუნის შუა პერიოდის ბუხრის Minton-ის დეკორატიული ფილის ნაწილსა და ძველ კალის ტოლჩას.

საშენ ქვაში შემორჩენილი იყო ექვსპენსიანი ბილეთი ბანქოს თამაშზე („ვისტი“), რომელიც 1949 წლის 14 აპრილს სამეფო კარის სოციალურმა კლუბმა მოაწყო.

შედარებით გვიანდელ მიგნებებს მიეკუთვნება 1957 წლის საფეხბურთო მატჩების ფსონების შეუვსებელი Littlewoods-ის კუპონები, გაცვეთილი შავი ლურსმნიანი ჩექმა და Silk Cut-ის სიგარეტის ცარიელი კოლოფი.

მუშებმა ასევე აღმოაჩინეს Daily Express-ის 1966 წლის გამოცემა. გაზეთში მოთხრობილი იყო „მატარებლის დიდ ძარცვაში“ ბრალდებული პატიმრებისა და მკაცრი რეჟიმის ციხეში მათი საცხოვრებელი პირობების შესახებ.

კიდევ ერთი ნაპოვნი დოკუმენტი გახდა ბუკინგემის სასახლის პერსონალისთვის განკუთვნილი ინსტრუქცია, რომელიც 1977 წელს დიპლომატიური კორპუსის მიღებისთვის მომზადდა.

გარდა ამისა, იპოვეს Schweppes-ის Malvern-ის წყაროს წყლის ბოთლი, ხის გამანაწილებელი კოლოფი და საშობაო ბარათების 6 შეფუთვა.

ბუკინგემის სასახლეში სამუშაოები თითქმის ათი წელია მიმდინარეობს. რესტავრაციის დასრულება 2027 წელს იგეგმება.