ჩეხეთის პრემიერი: გზას, რომელსაც მსოფლიო ახლა ადგას, უსაფრთხოებამდე არ მივყავართ - ის პირდაპირ ჯოჯოხეთის კარიბჭისკენ მიდის, მას მესამე მსოფლიო ომისკენ მივყავართ

ევროპის უსაფრთხოებისთვის აუცილებელია შეთანხმების მიღწევა უკრაინის წინააღმდეგ რუსეთის ომის დასასრულებლად. ქვეყნების ლიდერები იძულებულნი უნდა გახდნენ, დასხდნენ მოლაპარაკებების მაგიდასთან - აღნიშნულია ჩეხეთის პრემიერ-მინისტრის, ანდრეი ბაბიშის განცხადებაში, რომელიც მან პრაღის თავდაცვის სამიტზე გააკეთა.

ევროპამ და შეერთებულმა შტატებმა ომი დიპლომატიური გზით უნდა დაასრულონ, წინააღმდეგ შემთხვევაში, უკრაინის წინააღმდეგ რუსეთის ომი შესაძლოა მესამე მსოფლიო ომში გადაიზარდოს - აცხადებს ჩეხეთის პრემიერ-მინისტრი.

„ჩვენ უნდა შევაჩეროთ ეს ომი. ნათელია, რომ პუტინი აგრესორია. ის ნამდვილად აკეთებს იმას, რაც მიუღებელია. ევროპამ, შეერთებულ შტატებთან ერთად, აიძულოს უნდა როგორც პრეზიდენტი ზელენსკი, ისე პრეზიდენტი პუტინი, დასხდნენ მოლაპარაკებების მაგიდასთან. დიპლომატია სისუსტე არ არის. ეს წინსვლის ერთადერთი გზაა“, - განაცხადა მან.

ბაბიშის თქმით, აშშ-ის პრეზიდენტი, დონალდ ტრამპი მკაფიო სიგნალს აგზავნის: ეს ომი, უპირველეს ყოვლისა, ევროპის პრობლემაა. თუმცა, პრემიერ-მინისტრის განცხადებით, ევროპა „მტკივნეულად პასიურია და სრულიად უუნარო ან უნებლიეა, იმოქმედოს“.

„ჩვენ გვჭირდება ძლიერი ევროპული ლიდერობა, რომელიც იმოქმედებს. ჩვენი დღევანდელი ყოყმანის ფასი დამანგრეველია. არ მეშინია ამის ხმამაღლა თქმის: გზას, რომელსაც მსოფლიო ახლა ადგას, უსაფრთხოებამდე არ მივყავართ. ის პირდაპირ ჯოჯოხეთის კარიბჭისკენ მიდის, მას მესამე მსოფლიო ომისკენ მივყავართ“, - განაცხადა მან.