ჩინეთში, ისტორიაში პირველად, ხანდაზმული ადამიანების რაოდენობამ ბავშვების რაოდენობას გადააჭარბა

ჩინეთში 65 წელს გადაცილებული ხანდაზმული ადამიანების რაოდენობამ ბავშვების რიცხვს გადააჭარბა. ასეთი სიტუაცია 1949 წლის შემდეგ, როდესაც ქვეყანაში დემოგრაფიული სტატისტიკის წარმოება დაიწყო, პირველად დაფიქსირდა.

South China Morning Post-ის ცნობით, 2025 წლის ნოემბრისთვის, ჩინეთში მცხოვრები 1,4 მილიარდი ადამიანიდან 15,87% - 65 წლისა და უფროსი ასაკისაა. ამავდროულად, 0-დან 14 წლამდე ასაკის ბავშვები ქვეყნის მოსახლეობის 15,25%-ს შეადგენენ.

კვლევამ ასევე აჩვენა, რომ ქვეყანაში შრომისუნარიანი მოსახლეობის რაოდენობაც მცირდება. დღეს 15-დან 59 წლამდე ასაკის ადამიანები მთლიანი მოსახლეობის 61,89%-ს შეადგენენ. სულ რაღაც 10 წლის წინ შრომისუნარიანი მოსახლეობის წილი დაახლოებით 5,5%-ით მეტი - 67,33% იყო.

ჩინეთში ოჯახებიც პატარავდება. სტატისტიკის ეროვნულმა ბიურომ გამოავლინა იმ შინამეურნეობების ზრდა, რომლებიც 1 ან 2 ადამიანისგან შედგება.

2022 წელს ჩინეთის მოსახლეობა „დიდი შიმშილობის“ (1959–1961) პერიოდის შემდეგ პირველად შემცირდა. მოსახლეობის კლების მთავარი მიზეზი შობადობის შემცირება გახდა.