დავით მათიკაშვილი: სტრასბურგის ადამიანის უფლებათა ევროპულ სასამართლოში საქართველოდან წარგზავნილი სარჩელების რაოდენობა ერთმნიშვნელოვნად ადასტურებს, რომ საქართველოს ავტოქთონური სასამართლო სისტემა მოქმედებს გამართულად
სტრასბურგის ადამიანის უფლებათა ევროპულ სასამართლოში საქართველოდან წარგზავნილი სარჩელების რაოდენობა ერთმნიშვნელოვნად ადასტურებს, რომ საქართველოს ავტოქთონური სასამართლო სისტემა მოქმედებს გამართულად, - განაცხადა გადაცემაში „EURO ანატომია“ საპროცედურო საკითხთა და წესების საპარლამენტო კომიტეტის თავმჯდომარემ, დავით მათიკაშვილმა.
მისივე თქმით, სასამართლო არის ხელისუფლების უმნიშვნელოვანესი რგოლი, რომელიც დემოკრატიული განვითარების საფუძველთა საფუძველს წარმოადგენს. მათიკაშვილის განმარტებით, ბოლო წლების განმავლობაში, ევროპული ბიუროკრატიის მხრიდან სასამართლოზე კონტროლის მოპოვება იყო მუდმივი მცდელობის ობიექტი.
„გვახსოვს ვეტინგის სურვილები, თუ როგორ უნდოდათ, ადეიშვილის მოადგილეებსა და სხვა, არაქართველ, უცხოელ მოსამართლეებს, ჩაეტარებინათ ქართველი მოსამართლეების შემოწმებები და რა შედეგიც იქნებოდა, ამ შემთხვევაში მოლდოვის, რუმინეთის მაგალითი არის ნათელი. ეს ყველაფერი უნდათ, რათა საბოლოო ჯამში, მოიპოვონ კონტროლი სამართალწარმოებაზე და სამართლებრივ შედეგებზე.
რეალობა არის აბსოლუტურად სხვა. მარტივი სტატისტიკა - სტრასბურგის ადამიანის უფლებათა ევროპულ სასამართლოში საქართველოდან წარგზავნილი სარჩელების რაოდენობა ერთმნიშვნელოვნად ადასტურებს, რომ საქართველოს ავტოქთონური სასამართლო სისტემა მოქმედებს გამართულად“, - აღნიშნა მათიკაშვილმა.
მან ასევე ისაუბრა, რამდენად სჭირდებათ გარე ძალებს არჩევნების შედეგებზე გავლენის მოსახდენად სასამართლო ხელისუფლებაზე კონტროლი.
„როგორც კი არჩევნები ახლოვდება, ძლიერდება სასამართლოზე თავდასხმა და ზეწოლა. საზოგადოებისთვის არ იქნება რთული გასაგები, რომ არჩევნების შედეგების თვალსაზრისით, თუკი ევრობიუროკრატია შეძლებდა და საკუთარ ინტერესს სასამართლოში განახორციელებდა, სასამართლოს მხრიდან არაობიექტური ერთი გადაწყვეტილებაც კი, რომელიც იქნებოდა არჩევნებთან დაკავშირებული, მათი აზრით, საზოგადოების მღელვარებას გამოიწვევდა“, - განაცხადა მათიკაშვილმა.
იმედი
წყარო: imedinews.ge